October 12, 2022; Tourism department bultumin, a ruala guitar perh tam ber hmanga world record siam tura inbuatsaihna kalpui mek a ni a, chumi atan chuan YMA branch tin huamchhunga guitar nei zat hre turin Branch YMA tin te hriattir an ni.

ZALEN thudawn danin, Mizoram in International Tourism Mart 2022, November 16-18 chhunga a thlen turah a ruala guitar perh tam ber hmangin world record siam tum a ni a, hemi chungchangah hian Tourism department chuan YMA branch tin te hnenah an huamchhunga guitar neih zat hre tur leh October ni 20, 2022 ral hmaa report pe turin a ngen bawk.

Tourism Minister Robert Romawia Royte, Tourism Minister pawhin, International Tourism Mart neih chhung November ni 18-ah khawvela a ruala guitar perh tam ber kalkhawmna hun hman tum a nih thu leh hemi hmang hian Mizoram chu Guiness Book of World Records-ah pawh ziah luh beisei a nih thu a lo sawi tawh bawk.

He hmalakna ah hian a bultumtu Tourism depatment chu Central YMA leh Mizo Zaimi Inzawmkhawm (MZI) ten an thawhpui a ni.