DOWNLOAD OUR APP

Read latest news on your phone
play-store app-store
app-store
A ruh no no chhuakah
titi ZALEN
Aug 25, 2019
ad
  • Ramchhana Hmar, Phuaibuang
  • Kan naupan lai chuan thiante nena kan pawnto changin lamtang awmin kan insiam a, naupang pawntoin an tih thin ang ang hi chu kan ti ve thei mai zel a, a changin kan inhrui pawh a, a changin kan in khel a, mipa game bik awm lovin inkawibah lamin kan ti thei vek zel a, a chang leh kan inbuan a, chungah chuan a ruh no na na na chu kan hriat leh nge nge zel a, kan per leh lawp zel. Hun alo kal zel a, kan nun hlui te chu kohkir rual lohvin kan vuiliam hnem ta malh malh hle mai. Vui liam ve theih loh thil pakhat awm erawh chu kan naupan lai atanga kan tawngkam hman lar em em a ruh no no chhuakah tih hi hman atanga tawngkauchheh awmsa ni mah se, tun thleng hian ala hlui ve thei lo. Kan khawvel hman mek ngaihtuah leh kan ram dinhmun ngaihtuah neuh neuh chungin he tawngkam dikzia hi ka hre fiah telh telh a. Hnathawhna kawngah pawh a ruh no zawk chu kan dawng leh zawk zel chu a nih hi.
  • Khai mah aw! veng pakhata welding machine dawr ka hmuh chu thiante sawina atangin a rei tawh thu ka hria a, chu dawrah chuan hnathawktu pawh an awm ve nual mai, chu dawr chhunga hnathawh kawr ha tam zawk chu kan thenawm thalai vai an ni, an hna a thain an ti tak tak a, kawng pui bul maia thir vuak rik dum dum te, welding machine hmanga kah en zuai zuaite kha an zak miah lo, nuam an ti zawk hial niin ka hria, chu mai a ni lo, Mizo thalaite mamawh em em pawisa tam tak an thawk chuak zui, Mizo thalaite zingah welder nih hlawkzia kan inzirtir tum mek laiin Silchar lama kan unaute chuan kan ramah eizawn nan an lo hmang der tawh mai.
  • Chhinlung chhuak Zofate hian run lui kan lo kan chuan kan kutah tuthlawh leh chempui bak hum tur kan nei lo, tunah zet chuan kha kan kut ngeiah khan khawvel kan keng va va tawh a, kan hmasawnna tawngbuak hi a tam mah mah em ni? Kan ram kan tihve tura kan pi leh pute’n harsa taka an lo sahchhuahah hian kan tan hnathawh tur a tlem ta hle mai. Mahse, hnam dang tan chuan hna tau a tet a ni lo chauh si a.
  • Engtin nge kan hnuchhawn tak, ei leh bara intodelh ngai sang nun, mite kep nih ai chuan nghei mai pawh duh zawk nunah khan kan let leh thei ang? Kan tlai tan tawh mah se, kan la tlai chhe lutuk lo ve, Mizo nula tlangval tlawmngai, taima, hnathawh hreh nei lo tia kan sawi thinte kha kan pi leh pute an nih hrerengin intodelh duhna thinlung thar pu ila, hnasang leh hlawh tam takin min daih vek thei lo, kan taimaka thawhhreh kan neih loh chuan ei hmuhna khawp chu kan ramah hian hna ala awm a sin.
  • Tunah hi chuan hnathawhna lamah kan ruh a no em avangin, kan kawtkaiah hnamdang tlangval te nek chhuakin kan awm mek chu a nih hi, social media-ah hian kan thawmhnaw neih that ber nena kan thlalak ni lovin, kan hnathawh kawr nena kan thlalak te hi upload ve tawh teh ang u.
  • Kan ramah hian hnathawh hreh nei lo tan post a tam ber a, chu mi line-ah chuan thalai kan tlem ber thung. Degree neih thar avanga sawrkar hna ruak awm hmasa apiang a, MPSC Office-a dilna form lachhuak tur a insutpelh zut zutte hi a hnu thla hnih thumah chuan hlawhchhamna kawnah rual dial dialin an kal duh khawp a sin. Sawrkar hna thawh a tha lo ve ka ti lo, tun dinhmunah chuan kan indaih rih lo chu a nih hi, thawhhreh nei lo tan post sang chuang a awm reng a, hnam dang thalaiten min luh khalh leh thin, kan ram ngeia hnamdang thalaite aia kan ruh a no zawk ta fo hi a hnam ang pawha kan in enfiahna tur chu a ni dawn lawm ni.
  • Nu leh pate pawhin kan fate hi hnathawh zirtir uar sauh sauh ang u, nu leh pate u, kan hrilh ru ang che u, tunlai thalaite buaipui em em mobile game Player Unknown’s Battle Grounds (PUBG) avanga inchhungkua inbuai tawh chuan kha game khan a luhchilh chhung che u chuan inhlawhtling ngai lovang, a chhan chu maw raldo tlangau lung lung hian ral an kap thlu ngai lo, ral a hmuh hmain amah kha an kap thlu hman daih thin. Mite sawi danin he game pawhin Mizo thalaiten kan atchilh viau rualin hnam dang thalaite bawk kan ngam thin lo a ni awm e tak tak nimaw?
  • Nulate u, kan tlangvalte hnathawh kawr ha hi lo ngaisang lul teh u, aw tlangval nula feng chhing nazawng kha ngaisang suh, an zing tho hmel leh chawhnu hera an hmel kha a danglam teh a nia. Social media-ah kan ruh a no tawh lo, hnathawh lamah erawh kan ruh a la no hle si, hnathawh hi kan uar a nasa lehzuala kan inzirtir hi angai a, kan thawh peih lovah hian hnam dang thalaite’n a nuai tel an ramah an phur liam vut vut a, eng kan ti ta bik nge kan ramah meuh pawh hnam dangte aia a ruh no zawkah kan tan tlat mai le! Mizo nula, tlangvalte u, thlan tui far nan Zoram a zau lua e, hnathawh kawr nen hma lam i pan ang u.

Latest News & Chhiar Hlawh