An awm tak tak miah lo a nia; mahse, beiseina an nei thar veleh mek.

Hun rei tak, ‘an awm phak âwm lo em mai!’ tih tur, Liverpool hi Premier League-ah a zawnin an chak veleh ta a, a sang pali chu la hlat deuh mah se an sawi ri ‘feih feih’ ngam veleh ta.

Reds hian Inrinni zana 3-2 a Nottingham Forest an hneh hma khan Leeds United chu 6-1 in an lo sawp tawh a, hemi hma inkhel pahnihah Chelsea leh Arsenal an lo hnehtawk ve ve tawh bawk a, inkhel vawi li-ah tlawm an nei miah lo.

League-a a zawna an chak hnuhnung ber chu March thla tir lam, international break hma kha a ni tawh a, April thla chawhnu lamah an chhunzawm ve chauh.

Forest an hneh hnuah manager Klopp pawh a phur thar a, “Thil a inthlak,” a ti a. “Kan inven dan a tha a, ball kan chelh thei a. Vawiin khan  nawr pui tak tak pawh ka hmu a, heng hi kan tana pawimawh em em vek a ni,” a ti.

A sang palia awma season khara Uefa Champions League khelh phak chungchang sawiin, “Hetiang hi tun season-a kan tawn vawi khatna a ni a, beisei kan nei a, a la tlai lutuk loh kan beisei,” a ti.

Ni e, Reds tan hian an beisei neih thar hun hi a tlai hret tawh thei a. Pasarihna chauh an la ni a, point rukin a sang pali an la phak lo va, khelh sarih chauh an nei tawh.

Champions League khel tum hian Tottenham Hotspurs chuan theihtawp an chhuah ve mek bawk tih hriat tel a ngai a. Khelh sarihah hian pangaah tal an chak chuan Reds tan hian beiseina a inhawng lehzual ang a, Klopp-a beiseina neih hun hi a tlai lo tihna a ni ang.

Mahse, an hmabakah hian a sang palia tel tuma tan khawh mek - Manchester United, Newcastle leh Tottenham an hmachhawn tel a la ngai a, an tan kawng a awlsam lem lo vang tih chu a hriat reng mai.