ZALEN, Mar. 21, 3035: Mizo badminton player hriat hlawh tak ni thin, Lalmuanawma chuan Goa-a veteran inelna kal mekah Mizoram tan silver medal a vuak chhuah rualin India aiawha inlan turin a tling.

Pathianni atanga Goa-a khelh tan, Yonex-Sunrise 47th Indian Masters (Veteran) National Badminton Championship 2025-ah Hlimen, Aizawl shuttler hian 45+ Men’s Singles inelnaah silver lain kumin kum tawp lama Thailand-a khawvel huap inelnaah India aiawhin a tel theih phah dawn.

Mizoram Police Badminton Club-a khel lai, Muanawma hi September 7-14, 2025 chhunga Pattaya khawpuia Badminton World Federation (BWF) World Senior Championship 2025-ah India aiawhin a inlan dawn a ni.

Goa-a inelnaah hian Muanawma hi seeded ni phak lo mah se a khel tha hle a. Round of 64-ah KKS Pukhrambam chu 21-9, 21-17-a a hneh hnuah round of 32-ah Lakshmi Narayana P lakah game hmasa ber hloh mah se 18-21, 21-11, 21-13-in a hneh zui.

Round of 16-ah Seeded No. 4 Ashish Sharma nen intumin 21-18, 18-21, 21-10-in a hneh leh a. Quarter final-ah Seeded No. 5 Yuvraj Dhayal chu awlsam takin 21-15, 21-8-in a hneh leh . Final luh inchuhnaah pawh Chand Chawat lakah straight set (21-12, 21-12) bawkin a hnehna a chang.

Final-ah hian Seeded No. 1 leh India tan Olympic Games-ah pawh lo inlan tawh, Abhinn Shyam Gupta nen an inhmachhawn a, game hmasa berah 23-21-a a chak loh hnuah game hnihna an khelh leh tan chiahah a inhliam tak avangin a khelh chhunzawm thei lo va, silver medal-ah a lungawi a ngaih phah. 

Muanawma hi a vanglaia Mizo player tha ber zinga mi a ni thin a, kum tam zawkte inelna huangah pawh India ram aiawh thei khawpin a la che tha zel a ni.

Goa-a inelnaah hian 40+ Women’s Doubles-ah Lalduhzuali, Durtlang leh Ponty Lalramtluangi, Chaltlang ten Mizoram tan bronze medal an dawng bawk.

Duhzuali leh Ponty te pawh hi Muanawma ang bawkin unseeded an ni a. Round of 32-ah 21-12, 21-18-in V. Mehta leh Kiran Shete tangdun an hneh a. Round of 16-ah Poonam Bali leh Nidhi Chauhan te tangdun chu straight set (21-15, 21-15)-a hneh lehin quarter final an lut.

A thiam pariat inelnaah hian Jjimlu Ama leh Kamsar Yane te inkawp chu 21-6, 21-6-a sawpin semi final an inhlang kai a. Final luh inchuhnaah hian Seeded No. 1 Sandhya M. leh Sangeetha Mari te hmachhawnin 6-21, 17-21-in an hneh ta lo va, bronze medal an la a ni.

47th Indian Masters (Veteran) National Badminton Championship hi kum 35 leh 75 inkar tana buatsaih niin category 45-ah inelna a awm a, entry 2,290 lai a lut a. Kum 35+ leh 50+ inkar inelna zawh tawh niin 55+ leh 75+ inkar chhunzawm mek a ni a, Pathianni thlenga khelh tur a ni.

Inelna la kal leh mekah hian Mizoram atanga kal player-te pawh an la inlan mek zel a, Mizoram Badminton Association (MBA) chuan result duhawm an la neih an inbeisei.

MBA hian hlawhtlinna chang player-te an chhuan thu leh lawmman dawng pha lote an hmalam hunah hlawhtlinna an chan zel theih nan duhsakna a hlan.