Ram hruaitute hnathawk tura fehchhuak veng tute chu hel pawlin lambunin sipai pathum an kaphluma; hliam tuar an awm nual a, he thil thleng hi a rapthlak khawp mai a, mipuiin an dem a, an thin a rim bawk a, ram pumin a sun a ni. Inthahna hmun hi Hmar unau te'n Council an ngiat huam chhungah a awm nghe nghe a, mahse a chhunga cheng a tam zawk chuan rawng taka chetna chu an dem a, an demna pawh an thehdarh a ni. SHDC hotu pawhin an thiante chetdan an duh lo tih a sawichhuak a nih kha. Pawl hrang hrang leh tlawmngai pawlte chuan mihring nun hlut lotute thil tih chu an dem tih sawiin thleng tawh lo se an duh thu an tarlang a ni. Nunna chan satliah mai a ni lo a, chhungkua a eizawngtu bakah chhungkaw khat pa an ni a, chumi piah lamah mipuite venhim hna thawktute an ni a, mipuiin an hloh hi thil namai lo tak a ni. He thil thleng hian nghawng a nei na hle a, eng ang taka na-in nge nghawng a neih dan tur thlir thiam a har khawpa, sawrkar lu ber Chief Miniter chuan unau anga an pawm avanga HPC (D) te tingmit lo chauh a nih thu a sawi a, an chungchangah Chief Secretary chu Manipur a a tlukpui dawr turin a kal a ni. Inthahna chu CM chuan chona ah ngaiin a pawm hmiah bawk a, hei hian hma hun thlir a ti har leh zual bawk ang. Tuna a lan dan chuan sawrkar hian a huam thui a, a tul chuan a tawp thlen a huam tih a chiang bawk. Nunna chante aiawh tur sawrkar hna pek leh sum hlawm hlan tur a ni a, hetih lai hian hliam tuar emaw himdama chhuak-te emaw an chhungte emaw tiamin thil rapthlak pal tlang an ni a, an nun kawngah harsatna siamtu a ni thei a, a leh lamah chuan mihring tichaktu hmanrua a ni thei bawk. Ram hmasawn thui tawh te chuan hetiang a thlen hian taksa leh rilru enkawl uluk a ngai tih hriain ngaih pawimawhah an neih hmasa thin a, kan sawrkar hian hma a la zel turah ngai ila. Hetiang a thlen hian mipui chu thu chiang zawk a awm hma chu an thu hriatte thehdarh lo turin ngen an ni fo tawh a; tun tumah pawh hian mi tam tak an insum thei lo tih a lang a, inzir a la ngai hle a ni. Mi tinin tum tlat ila a ziaawm mai a rinawm a ni. Hmasawnna kan nei a; mimal emaw party leh pawl ang zawnga hamthatna/ hming thatna zawnga inbeihna a awm lem lo a, chin tawk kan thiam ta viauiin a lang a, a lawmawm hle a ni. Tuna mipuiin an hriat duh ber nia lang chu 'a chhan engnge? ' 'Engtin nge an kal tur te kha hel pawl te khan an hriat theih? 'Ngati nge' tih dang pawh a la awm nual ang. Eng pawh nise sawrkarin hma a la mek a; ngaihchang sela a fuh a rinawm a ni. Zoram mipui mai ni lo Zohnahthlak hmundanga awm thlengin hnuchhui pui thei tur thuruk hria emaw rawtna thlen duhte an awm chuan thuneitute hnena hrilhhriat vat ni se, a nihna takah chuan mitin mawh a ni zawk a; sawrkar pawh a inhawng tura ngaih a ni. Hmar unau chungah thenkhat chu an tuan duh mai ang tih ngaihtuahna a awm thei a, tun thil thleng hi Hmar 'demand area' a cheng mi tam zawkin an dem hle a, theihtawpin an auchhuah pui mek zel a ni. Hei hian mipui tam zawk rilru a hnehin a lang a, thlamuanga awm an duh tlang a ni. Thahnem ngaite chuan Hmar unaute leh Zohnahthlak dangte inkar tihngheh tumin tan an la sauh sauh a, chutih laia a tha lo zawnga che leh tawngkam a awm palh chuan tul miah lo ah buai belhna a chhuak dawn a, in ngaihchan tawn a ngai a ni. Hel pawl pakhatin sipai kapin pawi an khawih a ni a, Hmar zawng zawng ai an awh pha lo tih a lang a, phek en chi a ni lo. Kan Hmar unaute lam thlir chuan Council hran pek hi inthlan dawn hnaihah politician te'n an tiam fo tawh thin nia sawi a ni a, tih bik awm lo in political party te pawhin tawngkam hnutchhiah an lo nei tawh thin a ni mahna; hei hi a tak tak a nih chuan kan unaute hi vui thiang niin a hriat a, mahse nunna inlaksak kher hi chu engmahin a hen lo a. Mihring kan nih vang hian mimal nun inzahsak tawn hi mimal anga tih tur a ni a, thlah khat leh zung khat intawm kan la ni zui a, engti kawng zawng mahin tharum thawh zawnga chet a dik thei lo a ni. Engpawh nise dawhkanah thil tam tak chu a sawi fel theih a, tharum hi chu duhthlan tur awm tawh loh hunah chauh hman tur niin a lang a, chuti chung chuan a sawngsawhlawt dawn lo nia a lan phei chuan kawng dang dap a that a rinawm. Engtin nge sawrkar hian hma a lak dawn tih chiang taka hriat la ni lo mahse Sawrkarin hma a lakna chu mipui lamin an thlawp thiam a pawimawh hle bawk. Insuihkhawm tumin pawl lian tak tak te'n tan an la a, chumi chhut chhiat tuma kawhmawh bawl te chu CYMA pawhin ven hna thawh a tum a. Hman anga ropui kan duh chuan insuihkhawm hi hmanraw pawimawh ber a ni ngei ang. Thil chhia atangin a tha a chhuak hlauh thei a, tun tum thilthleng hi inzirna atan i hmang ang u.