A tha tur zawk a lo ni

K.L.Liana Hmanah, hetah Zalen-ah ni lo, ka sawi nel nual tawh a. Thisen pek kha ka ngaih si avangin Civil Hospital, Blood bank lamah an han chho a, ka thisen an keng a. Ka blood group chu O-nagative a nia, ka ti a. Blood bank-a thawkte an fimkhur ropui si a, an kan check a, O-nagative a ni lo, positive a ni zawk, an ti ta mai a. Kei ka chiang si a, ka awi lo lutuk a, ka thisen an la tha leh a, an ennawn leh a, positive a ni an ti tlat si a. Ka pawm lo thei ta lo a, ka thinlung chuan a pawm lo a; mahse ka pawm erawh a ngai a.
Thisen O-positive chu min pe ta a, a rawn khaitu Nurse chu ka fiam a, ka thisen chu 0-negative a ni sia, a dik lo mi pek chuan chung lamah kan inchhuahchhal a ngai ngei ang, ka ti a, kan nui dun hawk hawk a.
Blood group a inthlak ngai lo tih hi doctor-ho ngaidan niin ka hria a, ka han sawi pawh chu doctor pakhat chuan a theih loh a ti tawp. Mahse mi dang dang ka kawm kuala an sawi atang chuan, khawvelah hian blood group a inthlak, a danglam ngai lo tluk a ni a. Mahse thil theih loh chu a ni lo a, a inthlak, a danglam ve chang a awm thei a, thil vang tak leh awm zen zen erawh a ni lo. Mahse a inthlakin a dang ve thei tih an sawi a, a dik awm hlein ka hre ta zawk a.
Kan han sawi khawm tak liam liamah chuan tuna Serchhipa kan Chief Judicial Magistrate, Mangauri pawh a blood gruop a lo inthlak ve a ni awm e. Doctor-ten an awi lo lutuk a, ka thisen vawi 3 an la a, an han exam a, a dik miau si a, an pawm ve ta e, a ti! Min duhsak a ni ngei ang a, a tua ber nge ka hre lo va, social media lamah thisen pek ka ngaih thu leh ka bloood group chu O-Nag a nih thu an lo post a ni awm e. Chumi zan chuan Zuangtui atangin tlangval pakhat a lo kal a, thisen min pek a huam vang a lo ni a, mahse a blood group erawh O-post a ni thung a, min pe thei lo a, ka lawm hle tho mai.
A tukah nula pakhat, a blood group O-neg, ka anpui Zuangtui lama mi bawk a lo kal a, thisen min pe tura lo kal a lo ni a. Kan thla a muangin kan lawm em em mai a, mahse ka thisen an exam a, vawi hnih ngawt, positive a ni an ti tlat, ka ti a. Ani chuan a lehkhabu chhiar atangin hetiang hi khawvela thil awm ngai meuh lo, awm zen zen lo, mahse eng emaw changa awm ve zeuh thin a nih thu min hrilh a, mak a ti lem lo va. In lama ka chhungte chuan thisen pe tura tlawmngai mi pariat emaw lai an rawn in-report a nia an ti a. Kei tehlul min khawngaiha thisen min pek huama rawn tlawmngaite chungah chuan kan lawm em em a.
Blood group O-nagative kher hi a lo vang a, khawvelah hian an tam lo a ni awm e. Kei pawh 1990 chho bawr khan mi thisen vawi hnih emaw ka pe a. Chutah chuan ka blood group chu O a ni e, tih min hrilh a, ka hre ve a ni mai. Nagative leh positive a awm tih reng reng ka hre lo. Tum khat chu zanah hmeichhe pakhat hian Damdawi in atangin min lo phone a. 2003-4 vel kha a ni ta awm e.
Ani chuan, “Bethlehem vengah ka awm a, tunah damdawi inah ka awm mek a, thisen ka mamawh a, kan zawng nasa tawh a, kan hmu lo. Khawngaihin thisen min pe rawh,” a ti a. Kei chuan, “Ni e le; mahse, ‘tinge kei kher chu? Kan inhre ngai pawh a ni si lo a?” ka ti a. Ani chuan, “I blood group kha O-neg a ni a, chutiang chu Pu Newmana a awm a; mahse, a zun a thlum a. CRP 2 an awm leh a, pakhat inkhelin state dangah a thang mek a, pakhat lahin chawlh a la mek a, nang lo mi dang an awm lo,” a ti a. Mak ka ti khawp mai a, “Engtin nge nagative tih i hriat a? Chutiangin a lo awm hrang tih tunah ka hre ve chiah a ni,” ka ti a. “Hmanah mi thisen i pe tawh a, hetah damdawi ina an record a awm a, a thawkten min hrilh a ni,” a ti a.
Chutihlai chuan ADM(J) ka ni a, office pahin motor khatin kan chuang a, damdawi inah chuan kan chho a. Ka thisen pek tur nu chu a hming pawh ka hre si lo a, a hmel ka hre bawk si lo a. Mahse Nurse duty kan zawt a, kan inhmu ve mai a. nau nei tur zai ngai a ni awm e. Chutia kan inbiak lai chuan Dr Ramzaua a lo kal a, enge i rawn tih a? a ti a. Hei mi thisen ka pe dawn ka ti a. Ani chuan kal pah hian, nanga cancer thisen kan duh awzawng lo, a ti a, a nui suk a. A kal liam chu a ni ta mai a. Ani kha a zaitu tur a lo ni awm e. Nurse khan a ngai a ti lo a nih kha, haw mai rawh u, a ti a. Thisen pe lo chuan kan haw leh ta a.
Tunah erawh ka thisen chu positive a ni ta a, a group a inthlak kha ka tana tha tur zawk a lo ni daih mai tih hi tunah chuan ka hmuchhuakin ka hrethiam ta a, ka lawm hle mai. Nagative chu an tlem em em mai a, lo la ni ila chu ka buai ngei ang. A khât tawka thisen pek ka ngaih, lak ka ngaih hi a awm thin a. Nagative ni zel ila thisen lak turah ka buai dawn tih hi ka chiang a, blood bank-ah a awm ve lo bawk si. Tunah chuan thisen ka mamawh pawhin doctor kan pan a, blood bank atangin a tul an tih zat min laktir a, casualty-ah min khaisak mai thin a, kan tana tha zawk tur leh malsawmna tur zawk a lo ni reng mai a lawm mawle.

DOWNLOAD OUR APP

Read latest news on your phone

A tha tur zawk a lo ni

Latest News & Chhiar Hlawh