Qualifying tournament atanga inhawlh tling leh Mizo pool player tha rualte chauh inelna tur, Mizoram 9 Ball Pool Championship 2024 chu Thawhlehni atang hian Millennium Center chhuat zawl (atrium)-ah khelh tan a ni dawn a, en man chawi lovin chhim theih a ni ang.

Mizoram Snooker & Billiards Association (MSBA) leh CK HYUNDAI tangkawpte buatsaih, CK Hyundai Independence Day 9 Ball Pool Championship hi ni thum chhung chauh awh tur niin Independence Day-ah a hmawrbawk tura ruahman a ni.

Championship hi MSBA top 16 player-te chauh inlanna tur niin Mizorama Pool khel thiam bikte an kim viau dawn a, Lawmman pawh Rs. 50,000 zet sem ral a ni ang.

Inlan turte hi direct entry-a tel MSBA player tharual pariatte bakah Lungleia player tha pahnih leh qualifying tournament khelha che tha player parukte an ni dawn a. An inkhel hi Explore Mizoram Youtube Channel-ah live-a pek chhuah thin a ni ang.

Championship hi CK HYUNDAI-in a sponsor a ni a. Mahindra Tractors, Star Cement, Cafe Desire, Mualhawih Picnic Spot, Pepperfry Bawngkawn leh Marlboro te chu co-sponsor an ni bawk.