Aizawl February 24, 2023 : Nikum November-a Lunglei-a lung leh cancer natna a thlawna inentirna ‘Free Cardiology & Oncology Health camp’ neih hmalakna kal zelah phai hospital lama zai ngai lung natna nei mi pasarih (7) leh an chhungte’n nimin khan Chennai an thleng.

Corporate Social Responsibility (CSR) kaltlanga enkawl tur heng damlo pasarih te hi Shri Ramachandra Medical Centre, Chennai ah nimin khan admit nghal niin a thlawnin zai an ni dawn a, damdawiina an awm man leh an inenkawlna man te hi a thlawna tih sak an ni dawn a ni.

Damlo zai tur te hi mipa paruk leh hmeichhia pakhat niin an zinga naupang ber hi mipa kum 2 mi niin, a upa ber hi mipa kum 75 mi a ni a. Salem Veng, Lunglei; Lunglawn, Lunglei; Ramthar, Lunglei; Sethlun, Lunglei; Bazar Veng, Hnahthial atangin mi pakhat theuh leh Rangte khua atangin mi pahnih an tel a ni.

He hmalakna hi Lunglei District administration leh Shri Ramachandra Medical Centre, Chennai te tangkawp buatsaih niin Corporate Social Responsibility (CSR) hnuaia hmalakna a ni.