Khawvel cricket league lian leh sum tamna ber Indian Premier League final chu Zirtawpni zan khan khelh a ni a, Kolkata Knight Riders hnehin Chennai Super Kings chu a vawi li nan an champion. Dubai khawpuia, Dhubai International Stadium final khelhah hian Chennai Super Kings hian run 27-in an khingpui Kolkata Knight Riders hnehin trophy bakah pawisa fai cheng vaibechhe 20 an dawng tel a, pahnihna KKR hian cheng vaibelchhe 12.5 an hum haw thung.

Indian cricketer ropui MS Dhoni, Chennai captain ropuina zual zelin Chennai tan IPL title palina a chawipui a, Chennai hi kum 2010, 2011 leh 2018 khan an lo champion tawh a ni. Kum 40 mi Dhoni hian Cricket a khelh chhunzawm zel tur leh tur loh zawhna chu thu tlukna ala siam theih rih loh thu a sawi rualin, a hlawhtlinna vanga a lawm thu a sawi thung. 

Team vannei Kolkata Knight Riders hi, season tan tirah beisei an nei sang lo hle a. League-ah hian palina niin eliminator an paltlang thei hram a, hemi hnu hian qualifier pahnih paltlang lehin final an lut. Final-ah erawh an champion zo ta lo. Final inkhel hmuhnawm takah hian run 86 vaw chhuaktu Chennai Super Kings batsman Faf du Plessis chu player of the match-ah thlan a ni a, RCB player Harshal Patel chu player of the tournament atan thlan a ni thung.

Toss-a chak zawk Kolkata Knight Riders ten an vawm hmasa a, vaw hmasatu Chennai Super Kings batsman te an che tha nghal. Bul tantu Faf du Plessis chuan ball 59-ah run 86 zet a hlap chhuak a, Shubman Gill leh Venkatesh Iyer te pahnih chuan half-centuries an siam ve ve a, run 50 siam tur hian ball 43 leh 32 bak an mamawh lo ve ve bawk. KKR lam tan batsman Shubman Gill chuan ball 43-ah run 51 a hlap chhuak a, Venkatesh Iyer-a’n ball 32 atangin run 50 a hlap chuak a, Mavi-a’n run 20 a siam thung. 

Champion team Chennai Super Kings hian wicket 3 chauh hlohvin ball 120 atangin run 192 zet an vaw chhuak a,  KKR tan target a sang ang reng hle. Kolkata vuak hun a lo thleng ve ta a, a tir lamah an chet that rualin an innghahna pakhat an captain Eoin Morgan chuan run 4 chauh a siam tihin a out a, inkhelh a rei tulh tulh a an che nawi tual tual a tih theih. CSK tan Shardul Thakur chuan wicket 3 a la a, Josh Hazlewood leh Ravindra Jadeja ten wicket pahnih ve ve an vawm hlum bawk. Theih tawp chhuah mahse, Kolkata lam hian an tum ram an thleng phak lova, over 20-ah wicket 9 hlohvin run 165 chiah an siam thei a, run 27-in an chak zo ta lo. 

Indian Premier League, hi Covid-19 hripui leng karah April ni 9 khan khelh tan a ni a, covid hri leng a zual avangin May thla kha an chawl leh rih a, chumi hnuah  Dubai lamah khelh chhunzawm niin an zo fel thei ta hram a ni.