Detroit Pistons chuan Boston Celtics-in NBA chanchina chak lo zawn rei ber record an siam chu nihrualin a vawi 28 nan a zawnin an tlawm ta.

Detroit hi Philadelphia 76ers lakah 128-122-a tlawm lehin 2014-15 leh 2015-16 season-a Celtics-in record an lo siam tawh chu an nihrual a ni.

Inkhelah hian Pistons hian point 21 laia hma hruai fal lai pawh an nei a; mahse, a tawpah dingchang zo lovin hun pek belh (overtime)-ah a tlawm zawkah an tang leh ta tho a ni.

Inrinniah Toronto Raptors an hmachhawn leh dawn a, record chhe tak siam thei dinhmuna an din mek pumpelh tumin an beih a ngai dawn.

Celtics record an nihrual rual hian Detroit hi season khata a zawna vawi 27 chak lo hmasa ber an lo ni bawk a, Thawhlehnia 118-112-a Brooklyn Nets an hneh loh tum khan he record hi an siam a ni.

Ningani zan (India-a Zirtawpni chawhma)-a inkhelah hian record duhawm lo tak siam loh hram tuma beiin half time-ah phei chuan Pistons hian 66-47 zetin hma an hruai hman a; mahse, tan leh chiah, 3rd quarter-ah 76ers hian an pawt thla leh vek a, an tlansan zui.

A chak lo zawka an tan hman tep hnuah Bojan Bogdanovic chuan hun tawp hma chiaha vawm lutin an nihrualpui hrem a, overtime an khelh a ngaih phah a; mahse, an chak thei ta chuang lo va. 76ers hi tun season-a an vawi 24 chakna ni ve thungin an mualah 15-0 record an nei ta bawk.

Inkhel dangah LeBron James-a’n point 17 thawk chhuaka assist vawi 11 a neih zarah Los Angeles Lakers-in 133-112-in Charlotte Hornets an hneh.

Anthony Davis chu Lakers tana thun hnem ber niin point 26 a thawh a, NBA in-season tournament-ah vawi kua khelhah a vawi thum nan an chak.

Nikola Jokic-a lansarhna inkhelah Denver Nuggets-in 142-105-in Memphis Grizzlies an hneh bawk.

Jokic hian point 26 a thawh chhuah bakah rebound vawi 14 a la a, assist vawi 10 nei bawkin tun season-ah a vawi 11 nan triple-double a nei a. Nuggets hi a vawi khat nan season khatah a zawnin vawi ruk an chak ta bawk.

Brandon Ingram-a’n point 26 thawk chhuakin New Orleans Pelicans-in Utah Jazz chu 112-105-in an hneh a. Indiana Pacers chuan point 25 zeta hma an hruai tawhna hum zo lovin Chicago Bulls lakah 120-104-in an tlawm thung.

Dallas Mavericks an kaltluang lo chhunzawm zel a, Luka Doncic leh Kyrie Irving te inhliam tuarin vawi kuaa vawi ruk tlawm nan Minnesota Timberwolves lakah 118-110-in an chak lo.