ZALEN August 9, 2026: Airport Authority of India (AAI) hnena Lengpui Airport hlan turin Mizoram sawrkarin hmalakna a kalpui mek zel a, technical lama inremna a fel thawkhat tep tawh nia thudawn danin.

ZALEN thudawn danin Ningani khan AAI Technical team leh Working Committee to Look into the Maintenance & Management of Lengpui Airport chairman, adviser to chief minister ni bawk, TBC Lalvenchhunga te chuan airport chungchangah meeting an nei a, AAI kuta hlan chungchangah hian technical lamah chuan inremna a awm titih tawh nia thudawn niin, inbiakna dang erawh hmachhawp a la awm nia thudawn a ni.

Working Committee to Look into the Maintenance & Management of Lengpui Airport chu TBC Lalvenchhunga kaihhruaina hnuaiah November 18, 2024-ah din leh a ni a. Committee hi enkawltu dang hnena Lengpui Airport hlan chungchang zirchiang leh draft MoA buatsaih tura sawrkar din a ni.

March 15, 2025 khan NGO Co-ordination Comittee (NGOCC)-a tel pawl hrang hrang - Central YMA, MHIP leh MZP hruaituten Mizoram tlawha zin, Union Home Minister Amit Shah chu Raj Bhavan-ah an hmu bawk a. Pawl hrang hrangte hian an ngaih pawimawh thil chi hrang hrang an sawipui.

An sawipui zingah chuan Lengpui Airport tihchangtlunna tur sum ruahmansak tur leh tichangtlunna tura ruahmanna siam turin an ngen a. Union home minister hian tihchangtlun a duh thu leh a ngaih pawimawh thu sawiin AAI-in a buaipui tur thu a lo sawi.

Hetihlai hian March 16, 2026 Assembly Budget Session-ah Chief Minister Lalduhoma’n Lengpui Airport chungchangah Indian Air Force (IAF) nen an indawr zui tawh lo tih a sawi a. Chief minister chuan airport chungchangah IAF lam offer a tha a, AAI erawh an offer a chhiat thu a sawi.

“NGO leh political party lamin AAI hnena hlan zawk an tih avangin IAF nen kan indawr zui tawh lo. Airport chungchangah IAF nen kan inkarah thu engmah a awm tawh lo,” a ti bawk.

Ningani khan chief minister chuan AAI hnena airport hlan thuai tura ngenna Union Home Minister Shah-a hnenah a thlen a, a ngenna chu rang taka bawhzui a nih tur thu home minister chuan a lo hrilh a ni.