Aizawl: Aam Aadmi Party (AAP) Mizoram chuan zirlai harsatna tawkte tan hmalak zel an tum tih an sawi.

Nimin khan Aizawl Press Club ah chanchinbumite kawmin AAP, Mizoram hruaitute chuan sawrkar sikulte a that tawk loh avangin kan ramah private sikul a tam phah em em tih sawiin, chu chuan thingtlang leh khawpuiah nu leh pate tan harsatna nasa tak a thlen phah an ti.

“Keini zirlaite hian zirlaite hamthatna hrang hrang scholarship a hun tak a lak theih loh te, zirna in tha lo te, zirna hmanrua tha lo leh zirtirtu indaih lo leh tha tawk lote kan tawrh phah a, heng kan harsatna hre reng chung sia sawrkarin hma an la duh tlat lote hi tha lo kan ti a. Chuvangin, zirlaite zirlaite tanpui turin AAP Mizoram chuan Chhatra Yuva Sangharsh Samiti (CYSS) chu March 16, 2023 khan a din,” an ti.

AAP Mizoram hruaitute chuan India khawpui ber, Delhi AAP sawrkarnaah chuan sawrkar sikulin nasa takin hma a sawn a, zirlaite pawhin private sikul ai chuan sawrkar sikul a luh an thlang zawk hial tih an sawi a. “Heng AAP sawrkarna hnuaia hmasawnna nasa tak kan hmuhte hi keini zirlaite hian kan awt a, kan ramah pawh hian hetiang hi kan thlentir thei a ni,” an ti bawk.