Aizawl : School Education minister Lalchhandama Ralte chuan, Mizoramah academic session thar, April 2022 hmain zirtirtu indaihlohna sutkianna turin SEDP teacher lak a ni dawn tih a sawi.

Education minister hian March 2, Ningani zan khan Assembly session-a a demand sawihona a khaikhawmnaah Muster Roll (MR), CSS leh SEDP atanga hma an lakna avangin sawrkar school ah enrollment a pung tih sawiin, hun hmasa ah chuan school khar leh sawikhawmte a lo awm tawh thin thu leh tunah chuan chutiang ang chu a awm meuh tawh loh thu a sawi. "Tunah chuan room a an len loh vanga room tilian tura ngenna Directorate lamin an dawng nasa," a ti.

Lalchhandama Ralte chuan April, 2022 a Academic session tan hma in zirtirtu indaihlohna phuhrukna tur SEDP teacher lak an nih dawn thu sawi bawkin, a theih chin chinah a khawmi ngei lak an tum thu a sawi. 

Covid hrileng vangin private school ten harsatna an tawh nasat thu leh kum 2020 ah fee 50%, 2021 ah 70% an laktir tih sawiin, Academic session thar atang chuan 100% an lak tawh tur thu a sawi a, a pangngai (100%) a fee an lak loh chuan private school te an damkhawchhuak zo dawn lo niin a sawi bawk.

2022-23 academic session atangin naupang mit chak lo te tan text book large print (hawrawp lian) an siam dawn thu leh pawl 6-8 a zir turin Mizo thil leh zia hriat theihna tur 'ZO NUN'  tih telh a nih dawn thu te a sawi. "Mizoram Education Policy angin, Maths leh Science te hi Mizo tawng a zir theih turin dah vek a ni dawn a, hengte hi kan hlawhtlinna ropui tak a ni dawn," a ti bawk.

Education minister chuan exam system siam danglamin Scheme of Education an duang tih tarlang bawkin, "Question an siam atanga 40% chu zirlaiten anmahni irawm atanga an chhan theih tur bilh tel a ni dawn," tiin, chu chuan quality education ah hmasawnna a thlen an beisei niin a sawi.