ZALEN, November 21, 2025: Mizo Academy of Letters (MAL)-in kum thum dana a hlan thin, Academy Award (Posthumous) 2025 dawng turin Revd. Dr. Chuauthuama chu thlan a ni. 

Academy Award (Posthumous) 2025 hi November 28, 2025-ah Lalbiakzama, Speaker, Mizoram State Legislative Assembly-in MAL Kum Tawp Intawhkhawm, Assembly Annexed Conference Hall-a neih turah a hlan ang.

Mizo Academy Award hi MAL-in Mizo thu leh hlaa thawhhlawkte hnenah kum 1979 atanga a pek thin a ni a, Rev. Liangkhaia chu a dawng hmasa ber a ni.

Kumina hlan tur, Revd. Dr. Chuauthuama hi January 4, 2024 zan khan heart attack avangin a thi.

Ama pualin lehkhabu 58 a ziak a, mi dang nena an thawh hona leh a telna lehkhabu leh booklet 17 tihchhuah a ni tawh a. Chanchinbu hrang hrangah article thahnem tak a ziak a. Thu ziaka a hnathawh that avang te, ram leh kohhran tana hna a thawh that avangtein Serampore College (University) chuan Doctor of Divinity (Honoris causa) chu December 4, 2023 khan a hlan nghe nghe.