Aizawl: Zirtawpni zan dar 9:30 vel khan Vaivakawn atang Hunthar pana tlan sawhthing phur Truck AS-01/D-9295 hnamdang khalh chu Hunthar Veng Company peng thlen hmain kawngsir foot path dai liamin a tlan liam a, Sairang Road-ah a tla thlain na takin a zuk insawh a ni. Truck tlan liam tur hian kawngsir foot path-a kal, Lalrinfela (28) s/o Lalvullura, Kawrtethawveng khua chu hrut thlain, hliam na tak a tuar a, he truck-a chuang hnam dang hlir mi 4-te chuan hliam an tuar vek bawk. Lalrinfela hi a ke lehlam chu truck hian a chilh bung deuhthaw a, Aizawl Civil Hospital thlenpui a nih chuan a lo thi tawh a ni. Hnam dang hliam tuar mi 4-te zinga 1 chu admit a ni a, mi dang 3-te chu first aid pek an nih hnuin in lama inenkawl tura hawtir an ni. Lalrinfela hi Assam Regiment, Shillong-ah a awmin Ningani khan Aizawl a lo thleng a. Hunthar vengthlang lama an chhungte a tlawh haw lam hian vanduaina hi a tawk ta a ni. A ruang hi an khua Kawrtethawvengah vui a ni ang. Lirthei chetsual chhan hi a driver chuan a brake a fail vang niin a sawi.