Aizawl; Aizawl City Local Council Association chuan Inner Line Permit (ILP) pek chhuah thinnaa Local Council hriatpuina Seal an lo pek chhuah ve thin, sorkarin a nuaibo chu tha an tih loh thu an sawi a. ILP pekchhuah a nih dawna Local Council hriatpuina chhut kai leh ngei a nih theih nan hma la nghal turin sorkar an ngen tih an tarlangin, heng hi sorkarin a siam danglam thuai a nih loh chuan Local Council tin ten an mahni Area theuhah an hriatpuina tel lova ILP nei leh neilote dapchhuaka thenfai hnatlang la neih an rel. Aizawl City Local Council Association hi nimin khan Dawrpui School Hall-ah thukhawmin, Mizo dik tak veng chhunga pem lut leh chhuak turte hnenah Pem lehkha an phut thin laia, Local Council te hriatpui loha hnamdang khua leh tuia an khawsa tur chu Mizo hnam tan a him lo a ni, an ti a. Tuna sorkarin ILP pekchhuah dawna Local Council hriatpuina Seal an lo pek chhuah ve thin, sorkarin a tihtawp chu a rang thei ang bera hmang leh turin sorkar an ngen tih an sawi a ni. ACLCA hian resolution siamin, Aizawl Municipal Council hnuaia Local Council te thuneihna pawh tun aia sang zawk pek phutin, AMC-in Licencing Regulation a kalpui mekah Local Council ten 'No Objection Certificate' signed tura a tih angin, hriatpuina manah Rs.50/- lak theuh ni se, NOC pek thar turte hnenah Rs.100/- leh a la chhunzawm turte hnenah Rs.50/- lak tawh ni se, Local Council tin ten Certificate chi hrang hrang an pek chhuahah Rs.10/- lak ni se tih an ti bawk.