February 28, 2024; DC&MA minister C. Lalsawivunga'n, ADC te chhungkaw rorelna ah Mizoram Larsap thupek ni lovin DCMA department a inrawlhlo tih a sawi. 

District Council & Minority Affairs (DC&MA) minister hlui leh Hachhek bialtu MLA Robert Romawia Royte zawhna chhangin, DC&MA minister C. Lalsawivunga chuan, tun hnai sawrkar thar din hnuah, Autonomous District council pathumte internal affairs (an chhungkaw rorel) chungchangah Governor thupek ni lovin DCMA Department a inrawlh hriat a ni lo tih house a hrilh.

Memberte zawh belhna chhangin DC&MA minister chuan, Mara Auronomous District Council (MADC) tan a girls hostel Delhi a sak tur chu anmahni hmalakna liau liau a ni tih a sawi. "Hma an la a, amaherawhchu hnathawh theih a nih in a thawktu tur chungchangah harsatna a lo awm a, thawhtheih lohin a awm reng a, sawrkar thar a lo piang a, sawrkar tharin mipuite hmuh turin danglamna a lan chhuah tir a, rang takin a buaipuitu Mara te hnenah hnathawk turin a ti a, hmalakna a kal chho mek," a ti bawk.

DC&MA minister chuan ADC a aikal lak chungchang report tura tihna an thawn chu ADC thuneihna leh chanvo chhuhsak tumna a ni lo tih sawi bawkin, "Aikal lak chungchang hi sawrkarin ni 100 chhunga tih tur a puan zinga a mi a ni a, ADC te chanvo chhuhsak tumna lam a ni lo," a ti.