Aizawl District Football Association (ADFA) buatsaih, II leh III Division Season Ending Football Tournament 2023-ah College Veng FC leh Tanhril FC an champion.

Ningania Rajiv Gandhi Stadium, Mualpuiah final inkhel pahnih hi khelh a ni.

III Div.  final khelh hmasak niin College Veng hian Lalnunzira Sailo goal thun hmangin si khat faia Armed Veng South hnehin an champion a, goal hi tan atanga minute 10-na leka lut niin Armed Veng South hian sut tumin nasa takin bei mah se an sut thei ta lo.

III Div. torunament bikah hian champion team hian nomawi leh certificate bakah Rs 20,000 hlan an ni a. Armed Veng South hian Rs 10,000/- leh certificate an dawng thung.

Fair play team-ah  College Veng thlan niin Rs 2,000 leh certificate an dawng a. Best player-ah James Lalruatfela (Armed Veng South) thlan niin trophy, certificate leh Rs 1,000 a dawng a. PC Lalrempuia (Armed Veng South) chuan goal nga thunin goal thun tam ber a ni a, trophy, certificate leh Rs. 1,000 hlan a ni bawk.

Chawhnuah II Division final khelh a ni ve thung a, Tanhril FC-in 4-1 a Venghlui FC hnehin an champion. Inkhel a hmuhnawmin khaw lum tak hnuaiah tui in chawlh (water break) te neiin final match hmuhnawm tak hi khelh zawh a ni a.

Tanhril tan Lallawmpuia’n minute 15-ah goal hmahruai a khung a, chawlhlawk dawnah Lalramliana’n thun belh lehin chawlhlawkah 2-0 in hma an hruai a. Second half-ah Venghlui tan K Roluahpuia’n si khat sut mah se hun tawp dawnah Tanhril tan goal hmahruai khungtu, Lalawmpuia’n goal hnih a khung leh ta a ni.

II Div. champion team hian trophy leh certificate bakah Rs 30,000 an dawng a. Finalist hnenah Rs 15,000 leh certificate hlan an ni thung.

Fair Play-ah Tanhril thlan niin Rs 2,000 leh certificate an dawng a. Best player-ah final-a hattrick siamtu, Lallawmpuia chu thlan niin trophy leh certificate bakah Rs. 1,000 hlan a ni a. Top scorer pawh Tanhril champion-puitu Lalawmpuia tho niin goal 10 a khung a, trophy leh certificate bakah Rs 1,000 a dawng leh bawk.

Final khelh hma hian tournament kharna inkhawm hman a ni a, ADFA President Er. Lalzawmthanga kaihruaiah hian Er. Anup Chhetri, Chief Engineer, PHE, Adviser, ADFA chu khuallian a ni.