Aizawl District Football Association buatsaih II leh III division season opening football tournament khelh mek chu vawiin ni 28 September, 2022 khan AR Lammuah-ah final khel a ni a, II division-ah Ramthar Veng FC leh III division-ah Saikhamakawn FC te an champion. 

Match hmasa zawkah III division final khelh niin Zonuam FC leh Saikhamakawn FC te an inhmachhawn a, Saikhamakawn FC ten 2-1 a hnehna changin an champion. 

Inkhelh first half minute 32-ah Siamthara hmangin Saikhamakawn lam hian goal hmahruai an thun a, Rinnunga hmangin an goal hnihna chu minute 69-ah an thun leh. Zonuam lamin theihtawp chhuahin an bei let a, minute ruk hnuah Tlansanga hmnangin an si khat an sut a, an sut zawh hmain hun a tawp. 

Champion team Saikhamakawn FC te hian cheng 20000 bakah trophy leh Certificate an dawng a, pahnihna Zonuam FC hian cheng 10000 leh Certificate an hum haw thung.

Fair Play : Saikhamakawn FC : Rs. 2000/-

Best Player : David Vanlalruata, Saikhamakawn FC : Rs. 1000/-, Trophy & Certificate

Top Scorer : Lalrinchhuanga 5 Goal, Chanmari West FC: Rs. 1000/-, Trophy & Certificate

Second division final match hi chawhnu dar 1-ah tan niin Ramthar Veng FC ten 1st Bn. MAP Academy 3-2 a hnehin an champion.

He inkhelhah hian goal a lut mai lo va, goal lut lovin inkhel a tawp dawn emaw tih hnuah Ramthar Veng FC tan John F. Malsawmtluanga'n minute 85-ah goal hmahruai a thun a, minute 90+4" ah Zaithanpuia'n an si phurh a sut. 

Extra time khelh niin James Lalruatmawia'n minute 112-naah 1st Bn. MAP Academy tan goal a khung a, an champion tawh mai dawn emaw tih laiin HC Biakropuia a rawn lang. Ramthar tan minute 114-ah an si phurh sutna goal a rawn thun a, a hnu minute 4 lekah an champion-na goal ropui a khung leh. 

Champion : Ramthar Veng FC : Rs. 30000/-, Trophy & Certificate

Runner Up : 1st Bn. MAP Academy : Rs. 15000/- & Certificate

Fair Play : 1st Bn. MAP Academy : Rs. 2000/-

Best Player : Zomuanpuia, Ramthar Veng FC : Rs. 1000/-, Trophy & Certificate

Top Scorer : John F. Malsawmtluanga 6 Goal, Ramthar Veng FC : Rs. 1000/-, Trophy & Certificate