Aizawl District Hockey Association (ADHA) chuan hockey hmasawnna thlir chunga panga leh pangaa khelh tur tournament an buatsaih tur atan hma an la mek zel a. Committee peng hrang hrangte an din tawh bakah a khelhna hmun tura an ruahman pawh an en tawh.

ADHA hian August 19 leh 24 inkar hian Zoliana Royte Memorial Hockey 5’s Indoor Tournament buatsaih a tum a, LPS Vision nen thawkdun turin inremna pawh an lo siam tawh.

Zirtawpni khan LPS Office, Zarkawt-ah LPS Vision Director Lalsawmliana Pachuau leh ADHA hruaitute hi thukhawmin tournament hi LPS Arena, Falkland-a khelh turin thutlukna an siam a, LPS Vision-ah inkhel live-a pekchhuah a ni ang.

Inrinni khan ADHA hi torunament buatsaih tur thlirin an thukhawm zui nghal a. Hetah hian organising committee an din bakah sub committee eng emaw zat an din a, committee tê-a chairman leh secretary tur an ruat nghal a, anni hian a tul dan azirin an member tur an ruat ve thung dawn a ni.

An thutkhawm zawh hnu hian tournament khelhna tur, LPS Arena pawh en nghalin khelmual buatsaih dan tur leh tul dangte an thlirho nghal a ni.

ADHA-in panga leh panga inkhelhna tur inelna an buatsaih turah hian team tam zawk an tel theih nan village council emaw, local council emaw aiawha tel theih a nih dawn bakah club hminga tel theih a ni bawk ang.