Aizawl:  Mizoram Govt. Lumpsum Aided Higher Secondary School Joint Students Union chuan naktuk atang hian an thilphut tihhlawhtlin nawr nan kawngpui dan chhunzawm an tum. Nimin khan Joint Students’ Union chuan meeting neiin Adhoc Grant-in-Aid a hlankai phutna vanga khaw 9-a sawrkar office, zirna in leh kawng dan an neih mek, ni 27.07.2018 zana chawlh lailawk rih chu naktuk zing dar 6 atangin Sakawrdai, Farkawn, W.Phaileng, Zawlnuam, E.Lungdar, N.E Khawdungsei, Phullen, Zobawk leh Thingsulthliahah te chhunzawm leh nise an ti a. Heng khaw hrang hrang paltlanga zin veivakten hriatsaka an hmalakna thlawp tur leh zawmsak turin an ngen. JSU thuchhuah chuan heng khaw 9-a Higher Secondary School-te chu kum 2006 hmaa din vek an ni tiin tunhnaia sawrkar thuchhuah ‘Higher din phalna dan (Rules of 2006)’ chuan a huam lo niin an sawi a. Sorkar chu an thilphut tihhlawhtlinsak tura ngenin tuna an hmalakna hrang hrang sawrkar office leh zirna in zawng zawng khar bakah kawng dan (road blockage) in awmzia a neih loh chuan a aia nasa zawka hmalak an tum niin an sawi bawk.