Nikum khan Hollywood-ah inkahna a thleng a, he ta silai hmetpuaktuah hian American rapper A$AP Rocky chu puh a ni - thiam loh a chan chuan kum kua zet lungin tang thei dinhmunah a ding mek. Rihanna pasal hi Nilaini hian Court-ah inlan tura tih a ni a, an puhna chungchangah hian insawifiah tura tih a ni. 

A$AP Rocky hi a hming tak chu Rakim Mayers a ni a, nikum November khan Hollywood-ah a thian hlui nen intibuaiin silai vawi hnih a hmetpuak nia sawi a ni. Prosecutor chuan hliam tuartu lam hawi hian A$AP Rocky hian silai a hmetpuak a ni a ti a, hei hi a dik a nih chuan lungin a tang dawn tihna a ni. 

Los Angeles County District Attorney George Gascón chuan,"Vantlang hmuna silai hmehpuah hi dan bawhchhiatna lian tak a ni a, chhiatna nasa tak thlen thei thil a ni. A tum tak fuh loin pawisawi lote pawhin an tawrh phah thei a, dan bawhchhiatna nasa tak a ni," tiin a sawi. 

Kum 33 mi A$AP Rocky hi kumin April thla khan Rihanna nena chawlh an hmang haw lam chu Los Angeles International Airport-ah man a ni a, hemi atang hian nikuma inkahna thleng pawh hi a darh chauh a ni.  Mahse man a nih atanga darkar thum hnuah $ 550,000 in bail a ni a, a chhuak zui a ni - bailna hi India pawisa chuan vaibelchhe thum vel zet a ni! Man a nih hnu hian police te chuan a in an dap zui a, silai thahnem tak an man nghe nghe. 

Silaia a kah hi Terell Ephron a ni a, A$AP Relli tia hriat lar a ni bawk. An inkar sawifel tur hian Hollywood-ah an inhmu a, an inhnial buai hnuah A$AP Rocky hian silai hi a hmetpuak ta niin a sawi. Silai mu hian a ban vei lamah a fuh tih a sawi bawk. 

A$AP Rocky leh Rihanna te hian May thla khan an fa hmasa ber atan fapa an nei a, pa ber hi jail a tang a nih vaih chuan an buai ve khawp ang le.