Tun hnaiah Mizo film chhuak thar a awm nual a, tihchhuah leh mai tur pawh a awm nual. Chung zinga ngahhlehawm tak pakhat chu Adventure horror film 'DAMPUI FOREST' hi a ni. 

Mizo ten adventure film en tur kan nei meuh lo a, he lama tui mite chuan an bengkhawn khawp ang le. Shooting hi Adventure hmun hma nei tha Ngentiang khua, Serchhip District-ah an nei a, an shoot zo tawh. Tunah hian editing an khawih mek a, cover photo pawh an tichhuak ta.  

Dampui Forest hi film danglam tak niin, Mizo film a kan hmuh zen zen loh Adventure horror lam hawi tur a ni. Sports Department-in adventure sport tih theihna hmun tur leh nature tourism tih hmasawnna lam hawi hmun (place) zawng tura adventure team a tirhna film a ni a, harsatna an tawh loh ring suh - a hmuhnawm dawn! 

A changtute
A changtu te aṭang hian a hmuhnawm a rinawm hle bawk a, mipui hmuh chak inlan tur an awm nual. He film-ah hian Mizo tlangval chhuanawm leh huaisen adventure leh bushcraft lama min hrat khaw kheng Zira PC a inlan dawn. Ani hian tun hnaiah follower a ngah a, a chet velna hrang ngaihlutu an thahnem thin hle. 

Zira PC bakah hian comedian ṭha chungchuang parody music video nalh tak tak leh en hlawh tak siam thin ELZA TV kan hmu dawn a, ani hian tun hnaiah phei chuan YouTube lamah boruak a nei lian hle. Fiamthu thiam Pachuau Lalenkawla a la awm cheu bawk - hmaih phal chi a ni dawn lo.

Anni bakah hian Zonet buaisaih Mizo Girls Group finalist Lalnunhlui a inlan dawn a, hmeichhe solo camper, Love of adventure youtube channel neitu ni bawk Apuii Bualte a inlan bawk ang. Main role play tur Emily pawh hi MZI zaipawl lamah leh College kal laia College Miss te pawh lo ni tawh a ni - Kenny Lianhna kan hmu dawn bawk. 

Dampui Forest hi 'Detective Mart' film director Lalruatfela (Mart Khiangte) kutchhuak a ni dawn a, Ṭhatea Videoproduction chu Director of Photography a ni. June 20 hian trailer tihchhuah a ni ang a, July 28-ah release a ni ang - Runmawi Apps-ah en theihin a awm ang.