ZALEN December 11, 2024 : MZP General Headquarters Extended OB Meeting chu vawiin khan neih a ni a. Meeting chuan tun hnaia Aizawl Municipal Corporation (AMC) hnuaia hna lakah thil felhlel, mimal induhsakna a awm ngeiin a hria a. A rang thei ang bera sut a, dik taka hnala turin AMC hotute an ngen.

MZP chuan, "AMC Executive Council Meeting September 11, 2024-a thukhawm chuan an hnuaia hna hrang hrang, Fixed Pay leh Contract Basis-a lak nise a ti a. He Meeting thurel ang hian hna hrang hrangte hi advertisement tel lovin, an mi duhsak zawng an la ngei niin a lang a. Thalai lehkha thiam hna zawng mek tam tak awm karah, hetianga duhsak zawngte thun thawm hriat tur awm fo hi pawi a ti a, a dodal tlat a ni," an ti.

AMC Executive Council Meeting chuan, Public Relations Officer-1, Project Assistant-2 leh Asst. Account Officer-1 te hi fixed pay a lak turin a rel a, lak fel tawh a ni. Heng bakah hian Consultat Geologist -5, Urban Animal Husbandry & Veterinary Officer-1 leh Junior Engineer-1 hi Contract basis a lak tura tih a ni bawk. 

"Heng hna hrang hrang, hlawh pawh tha tak takte hi, a duh apiangte tana dil theih turin advertisement chhuah a ni lova. MZP-in a chhui zelnaah phei chuan sawrkar phalna pawh an la lo nia hriat a ni bawk. Chuvangin, MZP General Headquarters Extended OB Meeting chuan, AMC hnuaia dik lo taka hna lak hi tun kar chhung ngeia sut turin AMC hotute a phût a. MZP ngenna in awmzia a neih loh chuan, zirlai hna zawng mekte thlavang hauh turin theih ang angin hma a la dawn a ni," an ti bawk.

MZP chuan, "March ni 12, 2024 khan AMC hnuaia Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngeiin a hria a. Na takin a lo dodal tawh a. MZP ngenna angin AMC Executive Council Meeting March 15, 2024 (Zirtawpni) a thukhawm chuan, AMC hnuaia hnalak hrang hrangte a sut (revoke) a. March 18, 2024 (Thawhṭanni) khan sutna lehkha (order) hi tihchhuah a ni ta a ni," an ti.

"He hna sut tawhte hi tun hnaiah tharthawh leh niin, a mi ngai thenkhatte thun nawn leh ngat an ni hian, tu emaw duhsak zawngte hnaa thun theihna tura ruahman a ti rinhlelhawm hle a ni," an ti bawk.