January 12 leh February 10, 2024 inkara Qatar-a AFC Asian Cup an khelh turah Indian coach Igor Stimac chuan a squad a puang a, player 26 zingah Mizo pathum an tel.

Mizo player telte hi India ram mipui hriat hlawh sa leh Stimac-a pawhin a hman thiam sa pathum - defender Lalchungnunga, midfielder Lalengmawia (Apuia) Ralte leh forward Lallianzuala Chhangte te an ni.

Thla tir lama a koh chhin 50 zinga tel, Indian Super League-a Odisha FC forward Jerry Mawihmingthanga erawh Qatar-ah a kal ve dawn ta lo thung.

East Bengal defender Chungnunga leh Mumbai FC winger Lianzuala bik hi Stimac-a team-ah an mikhual lo va; Lianzuala phei hi chu India ram puma player tha ber nihna kawl lai a nih avangin hmaih theih a ni lo tih ngam a ni.

Apuia hi hun eng emaw ti lai khan ‘boss-in a koh duh loh avanga inhnialna’ awm hman kha ni mah se tunah chuan India innghahna a ni leh tawh thung.

Croatian coach chuan a player thlante chungchang sawiin, “An zavaiin football-ah chuan an thatna chu a inang vek a. Team kan ni a, chhungkua kan ni bawk a; mahse, nungchang tha a awm loh chuan talent ringawtin engmah a hlawh chhuah theih lo,” a ti.

Stimac-a hian inbuatsaihna chawlhkar hnih an la neih chhung chu tangkai taka hman an tum dawn tih a sawi a, “Tlarhnung phui tha, nawr dan thlak leh set piece te kan ngai pawimawh zual ang,” a ti.

“Penalty box chhunga mi mala inven a pawimawh dawn a, hei hi kan inkhela ka duhthusam lo lai a ni thin a. Kan inkhel hnuhnung tlemah pawh khan tul lova box chhunga goal chhuah kan nei,” tiin tihphui a tum hle.

“Kan tum tur pathumte hi technic leh physic-a tha tak leh rang tak vek an ni a. Tuna kan player-te fitness ena chawlhkar hnih chhungin eng ang chiahin nge hma an sawn kan en dawn a ni,” a ti.

Blue Tigers hi Asian Cup an khelh turah hian Group B-ah awmin January 13-ah Australia an hmachhawn hmasa ber ang a. January 18-ah Uzbekistan leh 23-ah Syria an hmachhawn zui ang.

Qatar-ah hian India hi an mikhual lem lo va, 2022 FIFA World Cup Qualifier pawh vawi li khel tawhin heng zinga pahnih hi mual neitu an tlawhnaah a ni.

Captain Sunil Chhetri leh Gurpreet Singh Sandhu te hi Qatar-in 2011 AFC Asian Cup a thlen khan India team-ah lo tel tawh bawkin Chhetri hian Bahrain leh South Korea lakah goal a thun ve ve nghe nghe.

Coach pawhin Qatar-a Indian fan-te lakah pawh beisei a nei sang tih a sawi a, “Qualifier khelh laiin Indian tam tak an lo kal a, Qatar laka tha taka vawi hnih kan khelh theih chhan pawh an ni a. Tun tumah pawh min rawn thlawp leh ngei ka ring a, kan pek leta result tha tak kan lawm ka beisei,” a ti.

Asian Cup-ah hian group paruka a sang ber leh a dawttu theuh bakah group-a pathumna titha paliin round of 16 an lut thei dawn a ni.

India team hi Inrinni hian Doha-a an pan zui a ni.

INDIA SQUAD:

GOALKEEPERS: Amrinder Singh, Gurpreet Singh Sandhu, Vishal Kaith.

DEFENDERS: Akash Mishra, Lalchungnunga, Mehtab Singh, Nikhil Poojary, Pritam Kotal, Rahul Bheke, Sandesh Jhingan, Subhasish Bose.

MIDFIELDERS: Anirudh Thapa, Brandon Fernandes, Deepak Tangri, Lalengmawia Ralte, Liston Colaco, Naorem Mahesh Singh, Sahal Abdul Samad, Suresh Singh Wangjam, Udanta Singh.

FORWARDS: Ishan Pandita, Lallianzuala Chhangte, Manvir Singh, Rahul Kannoly Praveen, Sunil Chhetri, Vikram Partap Singh.