Ramchhung and Rampawn

Afghan bomb puakah zirlai thahnem tak thi

Admin - May 01, 2021

Afghan bomb puakah zirlai thahnem tak thi

Afghanistan-a car bomb chak tak puakah high school zirlai eng emaw zat telin mi 30 an thi tih tual chhung thuneitute chuan an sawi.

Bomb hi Zirtawpni zana khawchhak lam, Logar province-a Pul-e-Alam khawpuia khualbuk pakhat, zirlaite awmna hmuna puak a ni.

Hliam tuar pawh tam tak an awm a, thil thleng hmutute chuan in chung chimin a hnuaia mite delhin tam tak an tang niin an sawi.

Islam thla thianghlim, Ramadan hman laia beihna lian tak thleng hi eng pawl mahin an tihah an la chhal lo.

United States President Joe Biden-an September 11-ah an ram sipaite an ko haw vek dawn tih a puan hnuah Afghanistan-ah hian tharum thawhna a thleng nasa hle.

Zirtawpni zana thil thleng hi an ram sanaa zan dar 7:00 (India-a zan dar 9:30) vela thleng niin khualbuk bakah a bul hnaia in eng emaw zat a tichhia.

Thi zinga tam tak chu high school zirlai, university entrance exam beih tuma he khawpuia kalkhawmte an nih thu Logar provincial council hotu, Hasibullah Stanekzai chuan a sawi.

Mi 90 vel an inhliam niin interior ministry thupuangtu, Tariq Arian chuan a sawi bawk.

Bomb puakin thil a tihchhiat zingah damdawi in leh mi mal chenna pawh a tel tih a sawi bawk.

“In chungte a chhia a, a hnuaiah mi an tang,” a ti a. Venhim hna thawktuten lak chhuah tumin an bei nghal tih a sawi bawk.