Heng player te hi an ram leh club tana record ropui siama trophy thahnem tak chawi tawhtu anni hlawm. Football hi Europe lama a lar ang bawkin a player te pawh an langsar thin. Chutihrualin, African continent lam player te theihna leh thiamna bakah mual chhunga an thil ropui te hi sawi nep a, theihnghilh mai chi erawh a ni lo. Africa hian football khawvel-a player talent nei tha leh langsar thahnem tak an kawl mek a ni. 

African footballer ropui 5 te chu in thlir dawn teh ang: 

5. Sadio Mane (Senegal)
    Thingtlang khaw te tak Bambali atang rawn chawr chhuak nimah se, Sadio Mane-a'n football a hlawh tlinna a chan hi a nep lo hle. FC Metz tana khel thin winger hi RB Salzburg lama a khelh hnuah mi hriat a rawn hlawh tan. A thiamna chuan club hrang hrang mit a la chho hle a, Southampton lam che hmasa berin £10million-in an lei chhuak. Coach tha Jugen Klopp chuan a thiamna lo hmu kiauin 2016 khan Anfield lama khel turin a lei chhuak a, chuhmunah chuan a thiamna leh theihna chu kan kan hmu fiah ve ta.         Kum 2019 khan Merseyside club tan Champions League a chawi a, hemi kum vek hian Premier League lamah a team-mate Mohamed Salah leh Pierre-Emerick Aubameyang te nen Golden Boot an dawng. He Senegalese pa hi Liverpool-in kum 30 zet hnua Premier League title an chawi theihna tura player tangkai ber pakhat a ni. Kum 2022-a Senegal team ten AFCON an lak theih nan Mane hian a thawh hlawk hle bawk. 

4. Mohamed Salah (Egypt)
    African footballer zinga Premier League lama tal ngap ber zing ami Mohamed Salah hi African player zingah game ropui footballer duhawm ber pawl a ni ngei ang. Chelsea lamah loan hmangin hun rei lo te a khelh hnuah AS Roma lamah a nghetin a lut a, Italy-ah hian he winger hian a thiamna a lantir nual hman a, a thiam zia hria Liverpool lamin an la lut leh a, chu hmunah chuan ropuina a khum ta. 
    Liverpool lamah hian Premier League title leh Champions League nomawi chawi tawhin 2017-18 leh 2018-19 season khan Golden Boot (pet goal tam ber) a dawng thei a, hemi tum hian goal 32 leh 22 a thun a ni. Kum 2018 khan Salah hi PFA Players’ Player of the Year atan thlan a ni bawk. 

3. Didier Drogba (Ivory Coast)
    Didier Drogba-a vanglai chu Chelsea golden generation an tih mai, Frank Lampard, John Terry leh Petr Cech te an awm khawm lai kha a ni awm e. Kum 2012 Munich khawpui-a Champions League final kha Chelsea fans te chuan an theihnghilh maiin a rinawm loh.         London club Chelsea tan Premier League title 4 lai a chawi hman a, he striker ngal chak hi 2006/07 leh 2009/10 season khan Premier League goal khung hnem ber a ni bawk. A ram Ivory Coast, international title pakhat pawh a chawi pui lo chungin African Footballer of the Year-ah tum 2 ngawt an thlang a, African footballer ropui zingah a hming hi sawi hmaih a ni tawh ngai lovang. 

2. Samuel Eto’o (Cameroon)
    Cameroon international hmatawng hmingthang Samuel Eto'o hi chu a inkhel pawh kan hmu fo tawh awm e. Samuel Eto’o hian African Footballer of the Year award tum 4 lai a dawng tawh a, amah anga dawng hnem African player zingah Yaya Toure chiah a awm. 
    2000 kum khan Olympic-ah a ram Cameroon chu gold a lakpui a, footballer te trophy chawi chak ber pakhat Champions League title chu Barcelona leh Inter Milan tan vawi 3 chawi tawhin final pahnihah goal a thun ve ve bawk.  
    Barcelona tan Eto’o hian league title 3 lain Inter Milan tan pakhat a la bawk. 2008-09 season-a Barcelona treble champion an nih khan player pawimawh ber pakhat a ni. He striker goal thun khawl hi AFCON leh Cameroon ram tan amah aia goal khung tam an la awm lo.  

1. George Weah (Liberia)
    A inkhel i la en lo a nih pawhin football ngainatu inih chuan George Weah-a hming hi i hre tawh ngei ang. African player zing a football chawimawina ngaih hlut Ballon d’Or (1995) dawng thei awmchhun niin hemi kum vek hian European Footballer of the Year leh FIFA World Player of the Year chawimawina a dawng tel. 
    Serie A team ropui AC Milan tana a khelh laiin Liberian pa hian title tum 2 a chawi a, Chelsea tan FA Cup leh PSG tan Ligue 1 title a chawi bawk. George Weah hi African Footballer of the Year atan tum hnih thlan a nih bakah IFFHS ten kum zabi 20 chhunga African player ropui ber atan an thlang. Tunah hian kum 55 mi ni tawhin an ram Liberia President a ni mek.