ZALEN August 31, 2023 : Agriculture Minister C. Lalrinsanga chuan ramngaw thiata lo neihin Environment danglamna a thlen avangin bultanna thar atana hmalak nan FOCUS hnuaiah IFS (Integrated Farming System) kalpui a nih thu a sawi.

C. Lalrinsanga chuan Permanent Farming System kalpui nan Terrace zau tak tak FOCUS fund hmangin Khawrihnim - Mamit District, Chhungte - Champhai, Samthang - Champhai, Hualtu - Serchhip, Sialsir - Serchhip, Chawngtlai, Chhawrtui, Lungchhuan, Suangkuang leh Thingdawl village area-ah te laih a ni, a ti a. Heng terrace-ah te hian thlai thlan bik fur-zikhlum, tomato leh thlai dangte chin niin tharchhuah tipung turin Bio-fertilizer te hmangin ruahmanna kalpui mek a nih thu a sawi bawk.

He hmalakna hi tlangram-lo-neih dan thar bultanna atana hman tum a ni, a ti a, terrace hi chherchhuan thum (3-tier system) a siam a ni dawn a, a chhuan hnuai berah – tin khat hmun aia zim lo, leh a chherchhuan laita ah – Cash crop (sum chang thlai) Dragon fruit emaw Limbu leh thlai dang remchang chingin, a chherchhuan thumna, a lu ber hi – Ngaw (Forest) a siamin sum chang thei thingkung – theihai, lamkhuang, butterfruit, zawngtah leh thlai remchang dang phun a ruahmanna kalpui tum a ni.