Aizawl; Animal Husbandry &?Veterinery Department chuan Mizoram a Ar note indaihlohna nasa tak phuhru turin hma a la mek a, Tanhril a an department hmunah Ar awpkeuna hmun an siam mek. He project senso nuai 389.50 chu NABARD leh a dang nuai 50 chu RKVY sum hmanga thawh mek a ni a, Ar in siam hna hi Poultry & Livestock Corporation, Ghaziabad ten an thawk a ni. AH & Vety department in ruahmanna an siam dan chuan he farm hi Zoram Poultry Development Society, AH & Vety Department leh INBRO Company ten an enkawl ang a, a hlawkna 50% hi Zoram Poultry Development Society in a chang ang a, a bak 25% hi state sawrkarin changin 25% dang hi thiamna thawhtu tur INBRO Company in a chang thung dawn a ni. He project hi a hlawhtlin hun chuan Mizoram pawn atanga Ar note lakluh 30% in a tihniam tura ngaih a ni a, sawrkar pawhin kumtin hlawkna Rs. nuai 16 a hmu thei tura chhut a ni bawk. AH & Vety thawktute chuan Mizo mipui ten Ar vulh uar hle mahse an buaina leh harsatna ber chu a buchip zual lai enkawl a ni an ti a. Hetih hun lai hian an thi duh hle tih sawiin enkawl harsat lai hun a pian atanga chawlhkar 3-4 inkar vel chhung chu Selesih Farm ah enkawl a ni ang a, Choak tiat vel anih hunah mipuite hnenah hralhchhuah a ni dawn chauh tih an sawi a, Mizoram chu ar note-ah a intodelh thuai an beisei. Animal Husbandry & Veterinery Department hian Tanhril hmunah vek hian ranchaw herna 'Animal Feed Plant' an kalpui mek akum 2003 atanga June 2014 thleng khan helai hmun atang hian Ar, Vawk leh Bawng chaw Kgs. 10817500 an herchhuak tawh a ni. Department hian Ar chaw kg khat ah Rs.5, Bawng leh vawk chaw kg khat ah Rs. 3 vel subsidise in an pechhuak a, mipui sum an hum zat hi Rs. 4,33,03,500 a tling a ni. Tanhril-a Vety farm hi tunhnai khan a changtu Minister C.Ngunlianchunga chuan a tlawh a ni.