ZALEN, Jan 9, 2026: National AIDS Control Organisation (NACO) in kum 2025-2026 chhunga India ram state leh UT hrang hrangah State AIDS Control Society hnathawh that dan a tehna September 2025-a a tihchhuahah Mizoram State AIDS Control Society (MSACS) chu Pathumna dinhmunah a awm a, he thu hi vawiin khan Health Minister Lalrinpuii chuan a office ah Meet the Press neiin a sawi.

Dr Jane Ralte Project Director, MSACS chuan HIV kai kawngah national average chu 0.2 a nih laiin Mizoram chu 2.75 a la nih thu a sawi a. 2018 atangin HIV/AIDS kai thar hi a tlahniam nia sawiin a do kawngah pawh NACO chuan hnathawh that ranking a pekah hma an sawn zel thu a sawi. 2024-25 ah 5-na niin 2025-26 ah 3-na an nih tak thu a sawi a ni.

October 1990 atanga November 2025 chhungin HIV kai 33,781 an awm hman a. April '24- November '25 inkarah HIV pai hmuhchhuah thar 3,257 awmin an zingah 179 chu naupai an ni a. Kai thar zingah 65.2% chu mipa niin hmeichhia chu 34% an ni thung.

A kai danah hian sex atanga kai 70.4% a ni a, 27% chu inchiu atangin a ni a, parent to child 1.8% niin chhan hriat loh 0.8% an ni.

Minister chuan, "HIV/AIDS dona kawngah theihtawp kan chhuah ve reng a ni tih a tilang chiang hlein ka hria,' tiin a sawi.

HIV/AIDS vei enkawlna atana MLA fund dah hran thin a nih thu sawiin Hulhliap Short Stay ah theihtawp an chhuah thu te a sawi bawk.

#ZalenNews