ZALEN August 2, 2025:Thlangtiang Futsal Club chuan AIFF Futsal Club Championship 2024-2025 khel turin August ni 4 Thawhtanni-ah Rudrapur, Uttarakhand an pan dawn. MFA Futsal League 2024 Champion Thlangtiang FC, Luangmual chuan Mizoram aiawh in National Championship hi an tel dawn a ni. 

Vawiin khan Players Fuihna leh Jersey tlangzarhna HYVE Aizawl City Hall-ah neih a ni a. He hun hi MFA Finance Secretary leh MFA Futsal Committee Chairman ni bawk LV Lalthantluanga'n a hmanpui a. Club President Benjamin Vanlalpeka leh Head Coach Thomas Lalengkima ten thu sawiin sum leh pai ah harsatna nei mah se, theihtawp chhuaha Northeast atanga Champion hmasa ber nih an tum thu an tarlang a ni. 

LV Lalthantluanga'n players te fuihna thu sawiin Football leh Futsal atan State Association leh AIFF hmalakna te hrilhfiah in harsatna karah pawh hmalak chhoh zel mek anih thu a sawi a. Players te discipline vawng tha tur leh Association leh Club hruaitute hmalakna zah a thuawih taka awm tur leh Mizoram hmel pholang tur an ni tih hre renga theihtawp chhuah turin a chah. Mizoram tana Champion nomawi chawi ngei tur duhsakna a hlan bawk a ni.

Thlangtiang FC Luangmual te chuan MFA 2025-26 Season atana an Main sponsor tur ARDECO Construction te chungah lawmthu an sawi a ni.

National Competition an tel theih nana thahnemngai taka hma lak saktu Sports Minister Lalnghinglova Hmar chungah lawmthu an sawi a. National zinna senso chhawk turin LESDE Department leh Mizoram State Sports Council te tanpuina ah lawmthu an sawi bawk.

Vamos Sportswear ten hun chep tak karha Official Jersey leh Club Officials te T-Shirt an rawn sponsor theih hlauh bawk a. An lawm hle. 

Thlangtiang FC te hi Pool B ah awmin nikum National Champion Corbett FC, Finalist Golazo Football Club leh Bhawanipore FC te nen an awm ho a ni. An match hmasa ber hi Champion lai Corbett FC te nen ni 07/08/2025 zan dar 7:30 p.m ah an khel ang.

Mizoram atanga tel tur awmchhun an ni tih hriatpui a, donation emaw sponsorship anga tanpui turin sports ngaina mite an sawm a ni.