All India Football Federation (AIFF)-in national team coach thar tur an dapna kal zelah a diltute a kawm kual tan mek.

India football thuneitu sang hian an hna ruak diltu 291 zet atangin an thlifim zel a. General secretary nihna chelh lailawktu, M. Satyanarayan chuan email hmangin an mi duhthlan ber tur hi an be nual tawh tih a sawi.

Email hmanga an biakah hian ‘thutlukna siam tura hriat ngai te, an thlan ber tur tihchianna tura ngai te an dap’ tih a sawi a. An mi dawr kualna hmang hian AIFF hian an mi duh chu thlifim zelin an hlawh atana an phut zat te, hamthatna dang an duh tel te, hna an tan theih hun tur te leh thil dang dang, mi mala duh tel an neih te pawh an zawt kual a ni.

AIFF hian mi eng emaw zat an dawr kual zingah Indian Super League (ISL) nomawi lo la tawh pahnih – Antonio Lopez Habas leh Manolo Marque bakah AFC Asian Cup-a rin loh taka quarterfinals-a Vietnam luhpuitu, Park Hang-Seo pawh an tel.

Times of India chanchinbu chuan, “AIFF chhungah chuan kan coach thar tur hi Indian football hre chiang tak ni se kan duh thlak hlawm,” tiin a tar lang a. “Manolo leh Habas te hian India-a hnuhma leh tawnhriat ropui tak an lo nei tawh a, an hnuhma hi hai der theih rual a ni lo va. Hetih rual hian an hlawh hi buaina a ni thei a, Igor Stimac-a contract tihtawp a nih ruala zangnadawmna avanga buai zuina ang kha thil buaithlak a ni,” an ti bawk.

Habas-a hi ISL-a coach hlawhtling ber a ni a, Atletico de Kolkata leh ATK champion-pui tawhin Mohun Bagan pawh League Shield a lakpui tawh a, ISL-a inkhel vawi 110 zet kaihruai tawhin kaihruai tam ber a ni a. Manolo-a pawh hi Hyderabad FC din thartu niin a mawhphaha awm kha kum 2022 khan ISL-ah champion a nihpui a, a kaihhruai team-a player pawh national team-ah an tel nual bawk.

AIFF hian coach kal chhuak ta, Stimac-a kha a contract a tawp rualin zangnadawmna avangin an buai zui hle a, hei hi nakin zelah a thlen nawn tawh lohna turin tuna an mi dawrte pawh hlawh leh sum leh pai khaihhnawihah an dawr uluk zual.

Stimac-a hian June thla khan FIFA World Cup qualifiers thard round a luhpui zawh loh hnu lawkah a bâng a. A aiawh tur hian AIFF chuan hna a zuar a, mi thahnem takin an dil a ni.