Tun hnaia India tana khel tur football team puan a nih apianga social media-a thunawn langsar ber pakhat chu, “Khawnge Apuia?” tih a ni thin a, tunah pawh hei hi a ni leh mek tawh.

Indian Super League (ISL)-a captain naupang ber ni thei, Mizo tlangvalin India ai a awh theih tâk miah loh chhan nia sawi hi phai lam chanchinbute chuan Ningani khan an ziak nasa hlawm hle a; All India Football Federation (AIFF) erawh chuan hemi chungchanga biakpawh tumna a chhang duh lo.

Kum 2020-a kum 20 mi lek a nih laia North East United captain ni thei, Lalengmawia ‘Apuia’ Ralte-in India ai a awh theih ta miah loh leh a chhan nia sawi rik awm chungchangah hian phai lam chanchinbute chuan AIFF General Secretary Shaji Prabhakaran pawh vawi eng emaw zat biak an tum a, hlawhtling thei an la awm lo.

Mumbai City tana khel mek, kum 22 mi hi India tana a inlan hnuhnung ber chu June 9-a Intercontinental Cup-a Mongolia an hmachhawn tum daih tawh kha niin a hnuah Intercontinental Cup leh SAFF Championship-ah khan a inhliam vangin a tel thei lo zui.

September thla tira Thailand-a King’s Cup khelh zawh takah khan a tira koh (probable squad) zingah a tel a; mahse, zin chhuak tak tak zingah erawh Mizo tlangval hi a tel lo zui leh.

Hei mai a ni lo va, Dalian, China-a AFC Under-23 Asian Cup qualifier khelh turah a kum leh a taksa fit-nain India aiawha feh chhuak turin tlin mah se a tel lo leh bawk.

Nilaini khan China-a Asian Games khelh tura India aiawhtu turte puan a ni a, hetah hian Apuia hi a tel lo leh a. Tun tuma a tel phak leh loh chhan hian sawi zui a hlawh ta hle a, khelmual pawn lam buaina vang nia puhna chu India chanchinbu liante pawhin an tar lang ta chuai chuai hlawm a ni.

May thla daih tawha Intercontineltal Cup khelh dawna Bhubaneswar, Odisha-a inbuatsaihna camp an neih laia thil thleng vang nia sawi a ni a. Team psychologist-in an rilru lam inbuatsaihna a neihpui hrang hrangah player-te chu zawhna chhan tur (questionaire) pein Apuia hian a hunah a chhanna a pek luh hman ve loh atanga intan nia sawi a ni.

Apuia’n a hun zawhna chhanna a thehluh hman loh thu hi psychologist hian head coach Igor Stimac-a a hrilh a. “Stimac-a hi a midfielder awm dan avangin a thin a rim hle a, thutlukna khawng tak a siam ta a ni,” tiin phai lam chanchinbute chuan an tar lang.

India rama chanchinbu lian ber zinga mi, Times of India chuan, “Apuia’n a huna a thehluh ve hman loh chhan hi kan hre lo va, (hriat thiam tawk loh thil a neih avangin) puih a ngai niin kan hria a. A hunah a thehlut ve lo tih thu chu psychologist-in a thlen hnuah Stimac-a hi a thinrim hle a, national team a enkawl chhung chu a hnuaiah a tel tawh dawn lo tih a sawi ta hial a ni,” tiin an thudawn an tar lang.