All India Football Federation (AIFF) chuan national team coach hmun ruak hnawh khattu tur an zawn meka dilna thehluh hun chu Nilaini khan an khar ta a, diltu 291 zet awmin tun thla tawpah ruat fel hman an tum.

Khawvel hmun hrang hrang atangin dilna hi an dawng tih Ningani khan sawiin an zingah Uefa Pro License nei 100, AFC Pro License nei 20 leh Conmebol license nei pathum an tel tih an sawi.

“India-a hna ruak ngaihventu zingah hian mi langsar tak tak pawh an tel a ni,” tiin AIFF chief Kalyan Chaubey chuan a sawi.

“September thlaa Fifa-in ram leh ram inkhelh huna a hawna chhawr hman turin July thla tawpah kan tifel hman ang,” a ti.

“AIFF Vice President Pu NA Haris-a kaihhruai committee-in dilna lo lutte hi a thlir leh phawt ang a, Executive Committee-ah an lo thlen ang,” a ti a. Lo thlir hmasa tur committee-ah hian AIFF hnuaia technical, league, competition, finance leh development committee-a chairman theuh leh treasurer pawh an tel a ni.

India mipa team hi thla hmasa khan Fifa World Cup qualifier-ah group nem taka lang atanga an tlak hnuah AIFF chuan Igor Stimac bânin a hmun a ruak ta rih a ni.

Kum 2019 atanga India team enkawltu, Stimac-a hian nikum October thla maiah khan kum 2026 thleng awm zui turin contract thar ziak mah se tun hnaia a result avangin tum aia hmaa bân a ni ta a ni.