All India Football Federation (AIFF) chuan airline giant, IndiGo nen inremna siamin an global partner thar a ni ta a. Indian football team player, official leh thawktu dangte a phur kual thin dawn.

AIFF leh airline thawhhona hi kum khat awh phawt tur a ni a, September 1, 2023 atanga August 31, 2024 thleng tur a ni.

IndiGo hian hmeichhe football team pawh infiamnaa hmeichhiate chawikanna atan a buaipui tel ang.

AIFF Secretary General Dr. Shaji Prabhakaran chuan, “Indian football tan ni chhinchhiah tlak a ni a. IndiGo hi sang taka thlawkin kan inkawpna hian sang takah min thlawhpui ang tih a chiang,” a ti.

Tun hmain eng airline mah an la thawhpui ngai lo tih sawiin, “He thil hi hriat reng tawh tur a ni,” a ti a. IndiGo chu thlawhnaa zin veivahnaah hmahruaitu an nih zel theih nan duhsakna an hlan tih a sawi bawk. 

Thawhhona hi kum khat chhung atan chauhva tih ni mah se Indigo CEO Pieters Elbers chuan hun rei zawk thawhho theih a nih thu a sawi a, “Pawl pahnih hian hmathlir thuhmun, Indian football hi sang zawka thlenpui tumna a nei dun a. Tun hi AIFF tana a bul tanna a nih rualin IndiGo tan pawh infiamna khawvela ring a rawlhna hmasa ber a ni bawk,” a ti.

Indian team hi November 16 hian World Cup qualifier khel turin Kuwait-ah an zin dawn a, an mualah Qatar an hmachhawn zui dawn bawk a. U23 team pawhin captain Sunil Chhetri-a hovin China-ah September 19 atangin Asian Games 2023 an khel bawk ang.

Blue Tigers hi Asian Games-ah hian Group A-ah Myanmar leh Bangladesh nen an awmho a ni.