ZALEN February 11, 2026: Valentines Day, February 14, 2026-ah hian Aizawl International Half Marathon (AIHM) chu a tum hnihna atan tlan a ni dawn a, he hunah hian International runner 20 chuang an tel dawn a, England leh France atangin pawhin rawn tlan tur an awm.

Vawiin khan Home Minister K. Sapdanga chuan a office-ah Aizawl International Half Marathon puala siam T-Shirt chu a tlangzarh a, thu a sawinnah Home Minister chuan Half Marathon buatsaih a ni chu lawmawm a tih thu a sawi a, khawvelin hriselna a ngaih pawimawh chhoh mekah khawvel huap inelna Sports Department ten an buatsaih chu lawmawm a tih thu a sawi.

AIHM curator Innovation India CEO Captain Rahul Bali chuan tun tumah hian Kenya, Ethiopia, Bahraihn etc. atangin international runner 20 chuang ten an telh theih tur an tichiang tawh a, visa pawh an nei tawh. Foreigner tan Mizoram lut tura 'Protected Area Permit' a ngaih avangin India ram an rawn thlen ve leh buaipui a ni ang a, PAP hi an neih theih ngei pawh an beisei tih a sawi.

Captain Rahul Bali chuan tukin zing khan phone call a dawn thu sawichhuakin England leh France atang pawhin rawn tel an rawn tum tih an rawn hrilh tih a sawi.

Aizawl International Half Marathon online registration hi vawiin tlai dar 6:00 thleng chauh a tih theih dawn a, 'offline registration' erawh February 12 leh 13-ah te Lammual-ah tih theih a ni ang, Junior leh Senior category hi offline chauh a tih theih a ni.