Aizawl : All India Professionals Congress, (AIPC) Mizoram Chapter chuan nimin khan MPCC president Lal Thanhawla chu Mizoram tana tlawmngai pawl tangkai tak tak dintu a nih avangin chawimawina thuziak an hlan.

AIPC chairman Dr. Henry Zodinliana chuan Mizo society-in vawiin thlenga kan tangkaipui association hrang hrang dintu a ni chu ropui an tih thu leh politics-a Mizoram bung thar min kaipui piah lamah society tana pawl tangkai dinpuitu a ni chu chhuanawm an tih avangin chawimawina hlan hi phu an tih thu a sawi.

“Media awmhona pawl zahawm tak MJA pawh hi Pu Lal Thanhawla hova din a ni a, Mizoram sports association lian ber Mizoram Football Association pawh ama hova din a ni, a pawl din zawng zawng kan sawi seng lovang,” Dr. Henry Zodinliana chuan a ti. "Cricket Association of Mizoram chuan thangkhat lian zet BCCI-a full member nih tumin an bei thin a, a harsa si a, member an nih theihna turin Lal Thanhawla chu president atan an sawm a, ama ho bawkin hlawhtlinna an hmu a, full member a nihpui a, kumtin nuai za tel teh meuh mai cricket hmasawn nan CAM hian an dawng thei ta a ni," APIC chairman chuan a ti.

Lal Thanhawla pawhin lawmpuina an hlan naah hian lawmthu sawiin a politics zinkawng chungchang a sawi a, Lal Isua telna tlak programme duan a pawimawh thu a tar lang a, remna leh muanna Mizoram a mamawh em em laia remna leh muanna aupuitu Congress chuan malsawmna a dawng a ni, a ti a. “Kum 83 ka ni dawn tep a, 1967 ah congress ka zawm a, remna leh muanna kan auhla a ni, politics tuinu ka hre ngai lo, ringtu tan politics hi rawngbawlna a ni. Politics a kan programme hi Lal Isua telna tlak a ni tur a ni tih hi ka sawi dan leh pawm dan a ni, Congress in remna leh muanna a thupui a nih avanga zawm ve ka ni, Lal Isua programme nen a inmil nia ka hriat avangin Congress programme hi a tha ka ti a, vawiin thlengin ka la awm a ni,” tiin Lal Thanhawla chuan a sawi.

Lal Thanhawla hian chawimawina ngaihsanawm tak tak a lo dawng tawh a, kum 1994 khan National Citizen Award hlan a ni a, kum 2009 khan civil society tana mi bik chawimawina, India rama chawimawina ngaihhlut berte zing ami Mother Teresa Lifetime Achievement Award hlan a ni bawk a, kum 2019 mai khan Serampore College chuan Doctorate of Divinity a hlan leh a ni.