ZALEN June 8, 2026: All India Radio kum 90 tlin lawmna Vanapa Hall-a buatsaih a hmanpui naah Chief Minister Lalduhoma chuan All India Radio chu Zo hnahthlak insuihkhawmna hmanraw pawimawh tak a ni a, kar hlaa awm hnam hrang hrangte awi tleitu a ni a ti.

Lalduhoma chuan All India Radio chu kum 90 chhung India mipuite awi tleitu ber ani a ti a, a hlutna chu a din atanga tun thlengin mipui thinlungah a la ngai reng tih sawiin AIR programme hrang hrang chu thenawm ram leh state tan a tangkai a, Zo hnahthlak insuihkhawmna hmanraw pawimawh tak anih thu a sawi.

AIR chu Mizo tawng hman dik chungchangah a entawn tlak hle a ti a, tawng humhalh kawngah a thawhhlawk hle tih sawiin Mizo hun hmasaa thil thleng pawimawh hrang hrang vawnghimtu a ni a ti.

Chief Minister chuan All India Radio chu ramchhunga mai bakah khawvel huapa Radio network lian ber a ni a ti a, tawng hrang hranga thupuang darh tam ber niin tawng chi hrang 23 leh chibil tawng (dialect) 146 chuang ngaihthlak theih a ni a, ram 100 chuangah All India Radio chu ngaihthlak ani tih a sawi.

Chief Minister chuan kum 2024-ah Oxford University-a Reuters Institute for the Study of Journalism in Digital News Report 2024-a tihchhuah ah India ram puma News channel lian hrang hrang chu zirchiangin Akashvani News chu India ramchhunga News puanchhuahna rintlak ber a ni a ti a, hei hi India ram hmun hrang hranga mipuite pawm dan a ni, a ti bawk. 

Lalduhoma chuan All India Radio chu India ramin Independence a hmuh theihna kawngah tangkai taka thawkin mipui inlungrual nan a thawhhlawk hle a, All India Radio Aizawl station chu kum 1966 July ni 31 ah din ani tih sawiin rambuai laiin AIR chu mipuite thleng phak chanchinthar puangtu pawimawh tak a ni a, Curfew avanga inkhawm theilo mipuiten Pathian fakna hla Radio kaltlangin an ngaithla thin a, kawng hrang hrangah All India Radio Aizawl in mipui tan rawng a bawl thin thu a sawi.

Chief Minster chuan Mizote zinga zaithiam hmingthang tak te chu All India Radio Artist te an ni a ti a, tun thlengin ram pumah AIR Artist chu zaithiam ten an hlut ber ala ni reng a ti a, All India Radio chu hnam zia humhalhtu pawimawh tak niin tunlai khawvel midang inngaihsak tawnna a tlem zelna ah Lungngai leh khawhar hnemtu, a lawmte lawmpuitu a ni reng a ti a, Radio in kum 90 a thleng chu a lawmpui thu sawiin tluang taka kal zel turin duhsakna a hlan a ni.