Khualzinte bungrua an enfiahna x-ray an ennawn lehnaah engmah hmuh a ni lo va, CCTV hmantlak a tlem, a mumal lo rei tawh Aizawl: Mizoram Police te chuan Lengpui airport atanga rangkachak tawlhruk a nih dan chu uluk takin an chhui mek a, he chanchin buatsaih lai thleng hi chuan man an la nei lo. Thudawnna dangin a tarlan dan chuan Lengpui Airport-a hnathawk tam zawk chu tunah hian rinhlelh kai an ni a. Hnuchhuinaa tangkai tur tak CCTV pawh hmantlak mumal a awm lo bawk. August 3, 2017 khan Aizawl atanga chhuak Jet airways passenger Zonunsanga (27) kut atangin Directorate of Revenue Intelligence (DRI) te chuan Kolkata airport-ah rangkachak kg. 9.96 an man a, a kengtu hi thu zawhfiah atan an kawl nghal a. DRI te hian Zonunsanga hi Kolkata airport terminal atanga a chhuak tur, step a kal lai chu tidingin a bag an enfiahnaah rangkachak hi an hmu niin thudawnna rintlak tak chuan a sawi a. ‘DRI te hrilh rutu an awm tihna a ni a, mi thahnemngaiin rangkachak hi man duh hrim hrim nise Mizoram chhungah pawh a report theih a, state pawna report a nih danah hian smuggler te inkara boruak chhia rah chhuah a ni thei a ni,’ tiin thulakna chuan a sawi bawk a ni. Rangkachak tawlhruk chungchang hi Zalen chuan a theih ang angin mi a kawm kual a, Zonunsanga hian hemi ni (3.8.2017) hian bungraw dang nei lovin ‘bag ah’ (hand baggage) chauh a nei a, Lengpui airport-a khualzinte bungrua enfiah (x-ray)-naah pawh rangkachak hi hmuh a ni lo a, a hnua hemi nia khualzinte bungrua an enfiahna x-ray an enawn lehnaah pawh hmuh a nih loh avangin airport-a thawktute nen inthuruala rangkachak hi tawlhruk a nih rinna a lian hle. Rangkachak tlang hi scanner-ah chuan lang chiang tak tura ngaih a ni a, hmaih theih nia ngaih a ni meuh lo. Lengpui airport a closed circuit television (CCTV) hi a chhiat avangin eng emaw thilsual ti duh tan pawh tihruk a remchang hle a, CCTV hi tha nise chuan rangkachak petu leh an lakluh dan pawh chiang deuha hriat theih a nih a rinawm hle. Zonunsanga hian airport a thawktute thurualpui a neih ngei a rinawm a, Security duty nge, loader nge airline hnathawkte tih hriat thiam a har hle. Zonunsanga inpuanna (statement) hi Mizoram Police chuan DRI te hi an dil a, Nilaini khan IGP (Intelligence) chuan lehkha a ziak a, an chhanna nghah mek a ni. Thudawn danin Zonunsanga hi judicial custody-ah a awm tawh avangin thil awm dan zawt chiang turin tunkar chho hian Mizoram Police te chuan Kolkata pan an tum. Zalen-in a chhuinaah chuan December 14, 2015 zana Zampuimanga thlan bula rangkachak phurtu motor suam a nih tuma hming lang, Lalhmingthangi w/o Zokhuma, Bawngkawn Lunglei road leh Zonunsanga te hi thlawhna ticket la dun, PNR Number pawh inang an ni a. Hemi ni pawh hian thlawhna pakhat ah hian an chuang dun a, Zonunsanga hi Kolkata-ah hian a chhuk a, Lalhmingthangi erawh Dehra Dun lamah a tlang a ni. Dan naranin passenger te hi thlawhna atanga an chhuk hnuah chuan anmahni leh an bungruate enfiah a ni ngai tawh lo va, hetia DRI lamin an lo dap chat danah hian report tha tak an dawng tihna a ni a, rangkachak tawlhtu lam intihthiam lohna nghawng zel a ni theia ngaih a ni. Zalen thudawn danin March 25, 2017 (Inrinni) pawh khan Lengpui Airport-ah hian rangkachak ni ngeia hriat kg. 25 vel chu Kolkata lam pan tur thlawhna ah phurh tum a ni a; mahse, rinhlelh a nih vangin kir leh a ni. Thudawn danin Jet Airways a thlawk tur passenger-te bungrua chu enfiah niin enfiah lai hian engmah thil dik lo hmuh a ni lo a. Mahse check-in counter-ah hian a rih lutuk avangin rinhlelh a ni a, ennawn leh tura tih a nih laiin bag neitu hian ‘motor part a ni a, ken in phal loh chuan ka dah let leh mai ang,’ tiin a bungrua hi a lalet leh niin an sawi a. A thil laklet hi polythene duma infun, thil sakhat a ni a, rangkachak ni ngeia rin a ni. Hetia finfiah pawh awm lova bag laklettir a ni hian mak tih a hlawh hle. Zalen thudawn danin March 25, 2017 a baggage an rinhlelh te hi Samuel Zoremsanga hminga booked a ni tiin, a pa hi Lengpui Airport Security-a kum eng emaw zat lo duty tawh Mizoram Police Inspector niin a tarlang a, baggage la let lehtu pawh hi Samuel Zoremsanga pa, Police Inspector hi niin chanchinbu pakhat chuan a tarlang bawk. Lengpui airport-a venhimna uluk leh khauh zawka kenkawh dan tur chungchang hi Zirtawpni khan IGP leh Police hotu lianten an enfiah a, hmalak dan tur an sawiho nghal.