ZALEN January 23, 2026: MPCC chuan vawiin khan Golden Hall, Congress Bhavan ah Political Session an hmang a, he hunah hian MPCC Senior Vice President Lalnunmawia Chuaungo chuan thu sawiin, "Tunhnaiah Lengpui Airport hrula ram inlei chungchangah thu a darh a, Mizoram mipui ten kan ngaihven tlang in kan vei tlang a, hetiang thil diklo kan vei hi a lawmawm hle in ka hria. Hetiang thil diklo tak hi kan enliam mai tur a ni lova, hetianga dan bawhchhiatna awm hi a ti tute hrem loha an chhuah loh nan mipuiten tan kan lak a ngai a, party ang pawhin kan enliam mai mai tur a ni lo," a ti.

Lalnunmawia Chuaungo chuan, "Lengpui Airport bula ram lei chungchangah hian MNF ho khan thil tenawm tak tih tumin hma an la a, sum vaibelchhe tam tak ei tumin thil an kalpui a. Mahse official-a an kalpui thui hma in an sawrkar kha a tlak tak avangin an tifel hman ta lova. ZPM an lo sawrkar a, February ni 21, 2025 khan kan CM Pu Lalduhoma hian compensation tam uchuak tak pek tumna a awm avangin Lengpui Airport bul ram inleina chu an titawp rih a, 'Abeyance' ah an dah tih a sawi anih kha. Mahse Abeyance ah an dah tak tak lo nge ni, Henry-a te an che a, May ni 25, 2025 khan ram inleina tur notification an ti chhuak leh ta si a ni."

"He ram in leina ah hian Land Aquisition Process mumal taka kalpui a ni lova, mipui a nghawng dan tur, social impact tur pawh zirchian a ni lova, hmanhmawh taka kalpui a ni. July ni 24 ah khan ram inleina an tifel vek hman a, ram lak dan tur kal hmang anga kalpui a ni lova, dan pawh an bawhchhe vek a ni," a ti.

TBC Lalvenchhunga thusawi chhang letin, "Hmanni khan Adviser to Chief Minister khan MNF sawrkar laia tih fel vek a ni tawh a, DC level ah tih fel a ni a, kan hriatpui lo tia a sawi hi CM leh sawrkar hotu lawk te hian an hriatpui a, dawt a ni. Dan bawhchhiatna tam tak a awm a, dan an palzut vek a ni," a ti.

AMC Inthlan chungchang sawiin MPCC Sr. Vice President chuan, "AMC inthlan an sawn hla te hi Democracy zah lohna leh ngaih pawimawh lohna a ni. AMC hi mipuiten an aiawh atana an thlan ten ro an relna a ni a, state sawrkarin direct-a a enkawl tur a ni lo. AMC inthlannte hi chhan leh vang tha leh mumal tak a awm loh chuan sawt hlat thiang a ni lo. Covid Pandemic vanga inthlan tih tlai erawh kha chu chhan tha tak vang a ni a, mi zawng zawngin an hrethiam a ni."

"AMC inthlan hi February leh March thla chhung a kan inthlan theihlohna chhan tha tak a awm lo. Thenkhatin Aizawl khawpui kawng siam mek hi April thla ah an zo dawn a, chu chu ZPM hian campaign nan an hmang a, kawng siam zawhah kan inthlang chauh ang an ti a, a pawi hle a ni. March ni 1 atang chuan state sawrkar kutah AMC hi a awm tawh dawn a, state sawrkar enkawlna hnuaiah AMC kan inthlang dawn a ni. Kan State Legislaltive Assembly hi an term tawp hunah inthlan buatsaih lovin sawrkar laipui khuan President's Rule ah thla engemaw zah min dah se, chumi hnuaiah chuan inthlang ila, chutiang vel chu a ni a, democracy palzutna nasa tak a ni," a ti.