Lengpui Airport ah kumin chhung hian rangkachak dan lova kaltlangpui tumna a awm tawh a, hemi bakah hian hman ni lawk khan rangkachak kg 10 dawn chuan security a paltlang nia ngaih a ni bawk a. He rangkachak kengtu hi Kolkata Airport lamah man a ni thung a ni. Zin dan chi hrang hrangah thlawhnaa zin hi a him a ngai hle a, hemi avang hian ken luh theih chinah pawh bithliah a tam a, security pawh uluk a ni viau thin reng a ni. Mizote hi hnam inhnaih tak kan ni a, khawtlang emaw kohhran atangin emaw kan inhre thim them a hei hian kan society nihphung a nghawng a, thatna tam tak a neih laiin a thalo lam te pawh a awm chho zel dawn niin a lang. Lengpui Airport hnathawkteah pawh Mizo inhriat tel telna hian hmun a awh thuk deuh nia ngai a awm theih a, inhriatthiamna thui tak hnathawk te pawhin an nei niin a lang fo thin a ni. Chutih rualin tuna rangkachak chungchang hi chu Mizo inhriatthiamna nen pawh inzul chi a ni lo va, thil inperhsan daih a nih avangin ngaihzam chi a ni lo va, danpui bawhchhiatna a ni a, kan airport neihchhuna hetiang a thleng hi a zahthlak hle a ni. Rangkachak phurhchhuah tum hmasak zawka inhnam hnawihte pawh thuneitute lam nia rinhlelh a ni a, chhui a nih mek laia hetiang zat a dang phurhtlang leh a ni hi a huatthlala awm hle a. He mia inhnamhnawih te’n sim an la tum lo hle tih tilang chiangtu pakhat a ni thei bawk ang. Tuna a lan danah chuan airport a hnathawk tam zawk te chu rinhlelh theih an ni tlat a ni. Hnuchhuitute tana hmanraw tangkai tak tur CCTV hman tlak mang lova a awm nia sawi te hi enchian ngai a ni a. A nihna takah chuan Airport te phei chu hmun pawimawh a nih avangin hmun danga CCTV ang ni lo, a tha leh changkang thei ang bera thuam ngai a ni zawk a, CCTV te phei chu chhe hman a ni lo hrim hrim bawk. Eng pawh nise, tun thil thleng hi thuneitu lamin an enfiah mek a, thil chiang zawk a hriat chhoh theih zel dawn a. He case atanga thil hmuhchhuah hian kan Airport siamthat leh tihchangtlun kawngah nghawng thui tak a nei ngei dawn a. Hnuchhuitute pawhin uluk leh fimkhur leh zualin he case hi umzui sela chhui chhuak ngei se a duhawm khawp mai.