Aizawl; September ni 3, Zirtawp zan khan Aitlang lui ral lamah bomb ni a rin puak thawm hriat a ni a. Hemi zan vek a Assam police te man, Phainuam mi 4 chu nimin khan court a inlan turin Silchar ah hruai an ni. Hetihlai hian Asssam police ten excavator chahbi leh a khalhtu (operator) mobile phone an chhuhsak chu nimin tlai thleng khan an la pe kir lo. 

Vairengte atanga ZALEN thudawn danin, Zirtawp zan dar 9:30 bawr vel khan Airtlang ah bomb ni ngeia ngaih puak ri tum hnih hriat a ni a, hei hian mipui a ti phawk lek hle a, buaina leh harsatna thleng erawh a awm zui lo.

Zirtawpni vek, thimhlim vel khan Phainuam mi 4, Phainuam atanga km 6 vela hla Bormon rama chakkhai lama kal, Lalnunhlima s/o Lalramtana, Laldawngliana (Mapuia) s/o Rangkhuma (L), Lalfakawma s/o Haukhawhena(L) leh Lalthakima s/o Lalengzauva te chu Assam police ten an lo man a, hemi chungchangah hian Kolasib district thuneitute bakah Phainuam khawtlang hruaitu ten a theih ang angin hmalakna an kalpui a, ZALEN thudawn danin, heng mi 4 te hi nimin khan Silchar ah court a inlan turin hruai an ni a, thubuai an neih tir dan a zirin, remchang hmasa berah bail a an rawn chhuah theih beisei a ni.

Hetihlai hian Assam police-te'n September 2, Ningani chawhnu dar 1:30 vela Vairengte khaw chhung atanga Aitlang ram panna tur kawng laitu excavator (JCB) chahbi leh a khalhtu (operator) mobile phone an chhuhsak chu he thu ziahlai nimin tlai thleng khan an la rawn pe kir lo.

Thil thleng chungchangah hian Kolasib SP, Vanlalfaka Ralte chuan Hailakandi SP bia in, chahbi leh mobile phone dah let turin a hriattir tawh a, Kolasib DC. Dr. H. Lalthlangliana pawhin Hailakandi DC hnenah lehkha thawnin, thil thleng chungchangah action la tur leh chahbi leh mobile phone dah let turin a hrilh tawh bawk.

Aitlangah hian nimin khan kawng laih chhunzawm a ni a, police ten vengin, he thu ziahlai nimin tlai thleng kha chuan boruak duhawmlo thleng a awm zui rih lo ni a thudawn a ni.