ZALEN September 18, 2025 : Mizoram Youth Commission Chairman Malsawmzuala Ralte chuan vawiin khan National Skill Development Corporation International (NSDCI) Chief Executive Officer, Alok Kumar chu NSDCI office, Kaushal Bhawan, Delhi-ah a hmu, Aizawl-a Japan tawng zirna hawng turin a ngen.

Malsawmzuala Ralte chuan Mizo thalai te zingah Japan a care giving/nurse leh a remchang ang hnathawh chak tam tak an awm tih sawiin, NSDCI nen thawk hova mizo thalai Japan tawng zir tura Noida-a thawn thin an ni a. Mizoram atanga a hlat tham avangin harsatna eng eng emaw an tawk thin tih Alok Kumar hi a hrilh.

MYC Chairman chuan hetiang hi an dinhmun a nih avang hian NSDCI CEO hnenah MYC Office, Aizawl-a Japan tawng zirna hawng turin a ngen a, classroom tur remchang a awm sa a, thalai tam tak zir tur an awm theih dawn thu sawiin Alok Kumara hian a thlawp thu leh a team te Aizawl-ah a rang lamin an rawn zin ang a, hmalak zui dan tur sawiho a nih tur thu-in a chhang a ni.

Japan a hnathawk tur hian Japan tawng zira pass phawt hnuah a kal theih a, tunah hian Mizo thalai 100 bawr vel hnathawkin an awm mek a ni. Tun hnaiah hian pawl 12 pass tan hun remchang a rawn hawng thar bawk.