H. Lalhmachhuana, Zobawm In

Covic Pandemic 2nd Wave-in Mizoram min han luhchilh chuan mipuite kan thlabarin khawsak phung tinreng a nghawng buai vek a ni a. Kan State khawpui ve ber Aizawl hi hri vei leh inkaichhawng tam ber na hmun a ni a. He hri leng dona kawnga hnar kaitu ber berte Health Dept.  lam thawkte leh C.S hova Management Committee te tan pawh tlachawp  thil rel fel tul reng - hrikai pun belh zel avanga total lockdown pawh kar 3 kar 4…. puan/hman te a lo tul hial a nia.

Hetianga hun khirh tak Mizoramin, a bikin Aizawla kan tawn mek laia kan Aizawl district bawrhsap (DC) hian a hmalak danahte han fak/sel phu riauna nei nia hriain chu chu tar langin thlirho ila. Tunhma pawhin NLUP leh SEDP leh Sawrkar Budget te pawh FAKSELNA kan tarlang thin a. Tun tuma mi pawh hi ‘chawngkhum dan tlang huat loh’ tiin personal taka lak aia bawrhsap dinhmun pawimawh theihzia zirho nan pawha kan hman theih beisei ila:
    
    a) Sorkar rate siam kan zawm em?: Hripui len nasat vanga kar 3/4 lai lockdown a nih tawh laia Aizawl khawpuia bazaar hun hawn a nih laiin, amah bawrhsap ngei maiin bazaar hmunpuia thil (sa & thlai) zuartuten sorkar rate siam angin an zuar ngai em etc… endik hna thawka a kal chhuak kha a ropuia, fak phu a ni. Sorkarin ruahmanna a siam dan zawm lotute lak a hremna lekkawh nghal theitu ber chu bawrhsap (DC) hi a ni a. Hetiang hian amah leh a aiawh (Officers or Local level Task Force) te hian bazaar hmun hrang hrangte hi endik thei fo se, “Bukna dik lo hi Lalpa tan tenawm…. khin dik… a lawm zawng tak…..”(TF 11:1) tih thu hi he Zohnahthlak Jerusalem khawpui Aizawlah hian kan vawng nung thui thei hle mahna!!

Amaherawhchu, sumdawnna leh bazaar na thil lam chu commerce department kuta awm (concern dept) a nih a vangin sa leh thlai rate te bawrhsapin lo endik  hi miten an dem zawk ang em le? Aw, ni e,  sumdawnna lama thil man rate-te siam chu bawrhsap hna ni lo reng a ni. Chutihrualin sorkarin  rate a siamte a man dik ni lova zuarte hremna kengkawhtu a ni tlat a. Kan bawrhsap hian a power, a mawhphurhna chin kenkawha tihhlawhtlin a tulzia a chiang hle niin a lang a. 

Chutih mek laiin, Covid vanga inkhuahkhirhna chhuanlama sumdawngte mahni hlawkna uma an thil neih sate a man dik aia to uchhuaka hralhtu lo awm se, kan bawrhsap hian a hrem tak tak ngam ang em le? Aizawl district chhunga civil administration (nunhona leh khawsakho na) kenkawhnaah mi dik leh thil dik zawk lam tanin tha leh tui a seng zel ang em le?

    b) Hri leng dotu sipai rual recruitment tactic: He Covid hri tihbaiawm tak hi a darh zel loh nan leh a lo thlen pawha a dona lama thawk turin LLTF/VLTF-te chu sorkar (management committee) chuan an tha tihchak a pawimawhzia a hria a. District tinah leh khua/veng tina sorkar hnathawk awmte pawh a remchan dan anga LLTF/VLTF zinga tel turin ruahmannate siam a ni a, thingtlang khaw tam takah chuan hetianga sorkar hnathawktu awmte hi an tangkai nghal viau a nih hmel a. Sorkar hian a hre tha hle mai. 

Aizawl khua (Municipal Area) bikah erawh hi chuan sorkar hnathawk hi an tam em mai a. Lockdown a nih chuan mahni ina awm mai bak tih tur nei lo an ni ber a. Chutihmek laiin hripui vei leh kai thar tam berna hmun a nih vangin LLTF-te hna a tamin a hautak hlawm hle a. Cointainment  area leh 4C awmnaahte buaipui tur a tam zual ngei tur lah ni. Tichuan, tunah hian Aizawl bawrhsap chuan veng tina task force chairman-te hnenah rawtna/ngenna tha danglam tak siamin, an veng chhunga sorkar hnathawk awmte, LLTF a thawk lote, an bio-data te a hnena thawn turin a hriattir ta vek mai. Veng khat bik focus (buaipui bik) tul bik thut awm palh pawha LLTF hnaa inhmang tura koh remchang tur hriat a awlsam phah ngei ang a. Tin, tuna 2nd wave bakah 3rd wave pawh a lo thlen palh thulh atan pawh a tangkai hle thei ngei ang. He kan bawrhsap hmalak mekna hian DC office leh veng tin Task Force/Local Council thawh hona a tiawlsam thei ngeiin a rinawm a. Kan bawrhsap hmangchang hriatna hi mipui hian kan tangkaipui ngei beisei ila, fak tlaka ngai mi tam tak kan awm pawh a rinawm a ni.

Amaherawhchu, hetia task force-te an buai hle laia DC-in an hna tur a pek belh hi sawiseltu kan awm mai thei- ‘DC Office chuan sorkar hnathawkte bio-data chu department wise-in a kawl vek tawh tura ngaih a nia, kan bawrhsap hian a power a exercise ve hrim hrim em ni?’ Ti te kan awm mai lo’ng maw? Chu bakah  sorkar hnathawk tam tak hi LLTF hnathawh lama chhawr tangkai chi an ni lo mai thei a, an nihna leh phone no te lo khawnkhawm buai a tul em ni tite pawh kan awm mai thei a ni.

Engpawhnise, he pandemic hripui donaa thawktute chu Pafa sabengtung zuar an sawi ang deuh dinhmuna ding an ni ber a. Aizawl District huam chhunga Civil Administration kengkawhtu ber a nih avangin kan Bawrhsap hian 2nd wave leh 3rd wave atan (Election awm hun atan pawh) Aizawl khawpui chung in enkawl nan a tha tur a a ngaih angin a thawk a ni ngei ang. Sorkar thuchhuak, CM or CS atang emaw, Home Dept or Health Dept or Election Commission atangte a thu chhuak apiangte kengkawha tihlawhtlingtu tur a ni miau a, a mawhphurhna pawimawh tak takte hlen chhuak tha tura a hmalaknate hi lo thlir zel phawt ila. 

Awle, Covid 1st wave hunlaia Aizawl DC (Bawrhsap Pu Nghaka)  khan sulhnu chhe sawi tur awm lovin a chhuak (kaisang) kha a ni a. Tuna 2nd wave hripui hluar zual zel laia kan DC (Bawrhsap Pi Hriati) hian hlawhtling takin he hripui do/beihna hi a kalpui thei ang em le??