Aizawl: Aizawl DC Office chuan Aizawl khawpui chhung tihmawina tur leh a tawp lai te thenfai na tur ‘Aizawl Beautification Project’ chu a kalpui mek. Aizawl DC Office hotute atanga thudawn danin ‘Aizawl Beautification Project’ phase 2 hnuaiah kar tharah hian an tih hmabak Bazar Bungkawn atanga Chanmari thenfai hna chu kalpui a ni leh dawn a. Phase 2 hnuaiah hian Vanapa Hall atanga Bazar Bungkawn flyover inkara hrui hnawk te thenfai niin January chhungin an zo thawkhat niin Aizawl DC hotute chuan Zalen an hrilh bawk. Tun kar chhoah hian an hmabak Bazar Bungkawn flyover bridge atanga Chanmari inkar tihfai niin Aizawl DC hotute chuan an sawi a. Hemi hlawhtlin nan hian a veng kal tlang tur Dawrpui, Chanmari leh Zarkawt veng hruaitute leh P&E Department nen an thawkho leh dawn niin an sawi bawk. Aizawl DC hotute chuan mipuite tawiawmna an hmuh nasat thin thu sawiin an hna hmabakah pawh hian mipuite tawiawmna an mamawh leh thu an sawi. Service provider hrang hrang mobile service provider, internet service pe chhuaktute leh midangte chu an hrui hmanlai chhinchhiahna siam turin an ti niin Aizawl DC hotute an sawi a. Thawhtanni khan an enfiah a, Thawhlehni atang khan hrui hman loh hnawkho chu an la thla zel niin an sawi bawk. Aizawl Beautification Project hi nikum 2017 atanga tan niin Aizawl DC chhuak ta Kannan Gopinathan a awmlaia tan a  ni a. Phase 1 hnuaiah nikumah Raj Bhavan gate atanga Vanapa Hall thleng thenfai a lo ni tawh a. Phase 2 hi November, 2017 atang khan tan tawh bawk niin thudawnna chuan a sawi.