Aizawl May 7, 2023 : Manipur-a buaina thleng meka Zohnahthlak ten harsatna an tawh chungchang ngaihtuah turin vawiin Pathianni Ni 7.5.2023 chawhnu dár 3:00 khan Central YMA chuan Aizawl Khawpui chhunga Branch YMA hruaitu aiawhte Central YMA Hall-ah a ko khawm a. He huna report pe thei tura nimin leh vawiin lama lo thleng Manipur Group hruaitu leh Imphal Branch YMA hruaitute hnen atangin thu haw lam leh kal lam ngaihthlak a ni bawk. Harsatna tawk te tan Branch tinah vehbur khawn ni se, an ti. He inhmuh khawm hi Central YMA President R Lalngheta'n a kaihruaia, General Secretary Prof Lalnuntluanga'n report a pe bawk a. Manipur Group YMA te hnen atangin thil thlen dan leh nunna chante bakah vawiin dinhmuna tanpui an ngaihdan ngaihthlak a ni bawk. Aizawl khawpui chhung Branch YMA kalkhawmte chuan Zohnahthlak harsatna tuar mekte tanpuinan mahni Br. YMA huam chhung theuhah tanpuina sumfai khawn nise, hemi kaihhnawiha raltlan lo lutte chu tha taka lo dawnsawn vek nise an ti a. Tin, mahni Branch YMA huamchhung theuha Raltlan lo lutte chhinchhiahna Central YMA in form a siam hmanga uluk taka lo chhinchhiah vek nise tiin rel a ni bawk. Inkokhawmnaah hian Aizawl khawpui chhung Branch YMA hruaitu mi 86 bakah CEC 40 leh OB mi 6 bakah Manipur Group YMA aiawh mi 5 te an tel a ni.