Aizawl: Aizawl DC Office chuan Aizawl khawpui chhung tihmawina tur leh a tawp laite thenfaina tur ‘Aizawl Beautification Project’ chu chhunzawm zelin Chanmari veng an thleng tawh. Thudawn danin khawpui chhung kawngdung a hrui hnawk leh a dangte thenfai hna ‘Aizawl Beautification Project’ chu phase 2 hnuaiah Chanmari veng thlen tawh a ni a, hemi zawhah hian Chaltlang lam la pan lovin Lower Zarkawt leh Electric veng an pan leh phawt dawn niin Aizawl DC hotute chuan Zalen an hrilh. Thudawn danin Lower Zarkawt leh Electric Veng zawh a nih hunah hian Chanmari atangin Chaltlang an pan leh ang a, Bawngkawn thleng thenfai a ni dawn a ni. Aizawl Beautification Project hi kum 2017 tawp lam atanga tan niin Phase 1 hnuaiah nikumah Raj Bhavan gate atanga Vanapa Hall thleng hnawk hrang hrang - hrui leh ban hman tawh loh leh a dangte thenfai a lo ni tawh a. Phase 2 hi November, 2017 atang khan tan a ni tawh bawk. Phase 2 hnuaiah hian Bawngkawn thleng, hrui hnawk leh thil dang thenfai hna hi thawh tum a ni a. Mipui tawiawmna an dil thu leh harsatna lo siam lo turin mipuite an ngen thu Aizawl DC hotute chuan an sawi a. Hetih lai hian Aizawl DC hotute chuan thenfai hna an thawh mek laiin an thenfai tawh, an kalsan takah mi thenkhatin hrui dang an lo thlung leh tawh nia an hriat thu Zalen an hrilh bawk.