Aizawl March 16, 2022 ; Aizawl dai, Rangvamual leh Phunchawng bakah hmun dang thenkhat a tualchhung siam rakzu te chu sumdawnna rilru tak tak pu a siam a nih hlawm tawh avangin hriselna atan a him lo zual tawh nia thudawn a ni.

ZALEN thudawn danin, a bikin Aizawl dai hnai a rakzu siam te chu an hmanraw hman te leh an sawngbawl dan hmuh in tunhma ang a ni tawh lo a, dawidim pangngai hmang mumal tawh lo in, hmanraw dang hmanga sawngbawl a ni a, reilote ah an siam/thlawr zo zung zung a, chu chuan zu in thin te ah insawiselna a siam zung zung mek a ni.

"Sumdawnna rilru pu tak tak chunga ti an tam avangin Aizawl dai a rakzu siam te a him lo zual em em tawh. Buh hmuh tur pawh awm mang lo khawpin an siam a, zu in thin ten insawiselna an neih hrang hrangte hi scientific proof chiah la awm lo mah se, tualchhung a siam rakzu hian tunhma a pha tawh lo nasa," thudawnna chuan a ti.    

Hetihlai hian hun engemaw kalta atang khan kawngpui dung vel leh a hmun a zu zuarte bitum turin Rangvamual ah Excise & Narcotic Outpost siam a lo ni tawh a, chutah chuan officer pakhat leh thawktu dang 6 englaipawhin an duty a, an hnathawh a tangkai a, Rangvamual bakah Phunchawng lam thlengin tunhma aiin kawngpui dung a ralmuan phah a, din a nih atangin an hnathawh ah hlawhtlinna tam tak thawh an nei tawh a ni.