Aizawl February 25, 2023 : Aizawl Municipal Corporation buatsaih, Aizawl Day vawi 133-na lawmna  chu vawiin February 25 khan khar a ni a.  A lawmna pui ber Aizawl Sipai Lammuala programme buatsaihah hian Aizawl Municipal Corporation Mayor Lalrinenga Sailo chu khuallian a ni a, Kumtin Aizawl Day chu February 25 apianga lawm tura ruahman a nih thu a sawi.

Aizawl Mayor Lalrinenga Sailo chuan kum 1890 February 25 atang khan Aizawl-ah mei mit lovin khawpui hi luah tan a ni a, he hi Aizawl khawpui din tan niah chhiar a ni, a ti. "Kum 133 chhunginAizawl-in hun hlimawm leh hun khirkhan te a lo paltlang a, Indopui pakhatna ah phei kha chuan France rama kal turin Sipai Lammual-ah Mizo tlangval 2100 zet an pungkhawm a, chutiang chuan mi ram te ang bawkin Aizawl hian history tam tak a nei a ni," a ti. 

Lalrinenga Sailo chuan, Aizawl Municipal Council din tan atangin vawiin thlengin Aizawl khawpui hmasawnna turin AMC chuan hma a la a, kawng hrang hrangah hmasawnna a hmu chho zel, a ti a. Sawrkarin ruahmanna a siam te, dan a duan te, in leh lo sak dan te, khawpui enkawl danah te sawrkar dan zawm hram hram turin mipuite a sawm a ni. 

Aizawl Day lawm rel a nih dan te sawiin, mipuiten hna nasa takin an thawk a, a te ber atanga a lian ber thlengin he ni pual hian hun hlimawm tak hman phu nia hriat anih avangin AMC chuan Aizawl Day hi ropui taka hman ni se, tiin a rel a ni, a ti. Kum lo la kal zel turah pawh Zofate Jerusalem Aizawl khawpuiah Aizawl Day hmannaa tel theuh turin ram chhung leh ram pawna awm Zofate a sawm nghal bawk.

Kum tinin Aizawl Day hi February 25 apianga lawm tura ruahman a ni a. A lawmna buatsaih hmasak berah hian Film Festival te, thiam thil hrang hrang pholanna exhibition te, cosplay te, naupang infiamna hmun te, band intihsiak te, football tournament te, costume parade te, photo exhibition te buatsaih niin food stall siam a ni bawk. National Small Industries Corporation sponsor-in Lammualah hian stall 60 zet sak a ni.

Aizawl Day puala inelna hrang hrang buatsaiha titha lawmman te sem nghal a ni a. Football ah Ward No. 12 an champion a. Ward fai berah Ward No. 1 thlan an ni a. Band contest ah Sol Nova Band chu pakhatna an ni.

Vawiin Aizawl Day lawmna pui ber Aizawl Sipai Lammuala buatsaih hi then hniah then niin thenkhatna hi Municipal Commissioner  Zothanmawia’n a kaihhruai a. Aizawl Deputy Mayor R. Thanglura’n lawmthu sawina hun a hmang a. Then hnihna hi Laltlanzova Khiangte, Executive Councillor, AMC in a kaihruai a ni.