Aizawl: Aizawl Deputy Commissioner office chuan Aizawl chhunga kutdawh pung mek chu zirchianna an nei dawn a, an pun zel loh nan hma lak an tum bawk. Aizawl DC Office a Additional DC, John LT Sanga chuan Zalen zawhna chhangin Aizawl-a kutdawhte zirchianna an nei dawn tih a sawi  a. Aizawl chu kutdawh awmlohna a ni thin tih sawiin tun hnaia kutdawh lo pung ta deuh chu mi thenkhat hnen atang pawhin zawhna an dawn zeuh zeuh thu a sawi a, kutdawh lo pung chu an ngaimawh thu leh hei vang hian zirchian a ngaih thu a sawi a. Aizawl DC Office hmalaknain DC level-ah kutdawhte zirchianna hi kalpui a ni dawn ta niin an sawi. Additional DC chuan kutdawh zirchianna tur format chu peih fel a ni tawh tih sawiin hetah hian zawhna hrang hrang kutdawhte zawh tur leh anmahni hriatchianna tur a awm thu a sawi a. Heta tang hian eng ang dinhmunah nge an awm tih te, an dinhmun atanga lachhuak tura puih theih dan a awm em tih te a lang dawn a ni tiin a sawi bawk. Additional DC chuan kutdawh te chu Mizoram mi an ni em tihte hriat chian a ngaih thu an sawi a, state dang atanga lo lut an ni em tih te zirchianna hian a tihchian dawn thu a sawi bawk. He zirchiannaah hian a tul dan a zirin Aizawl Municipal Corporation te nen hma an la ho dawn niin Additional DC chuan a sawi a. April thla atanga tan theih a beisei thu Zalen a hrilh bawk.